"Реал", МЮ ва Португалия терма жамоаси собиқ мураббийи ишсиз қолди

Колумбия футбол федерацияси терма жамоа бош мураббийи Карлос Кейруш ишдан бўшатилгани ҳақида расмий баёнот берди.

"Кейруш икки йил мобайнида ўз билимлари ва тажрибаларини биз билан ўртоқлашди. У билан ишлаш бизга катта ютуқ бўлди. Сизнинг футболимизга қўшган ҳиссангиз бошлаган лойиҳаларимизни давом эттиришда қўл келади. Профессор Карлуш Кейруш, кейинги фаолиятингизда муваффақиятлар тилаймиз", - дейилган баёнотда.

67 ёшли мутахассис қўли остида терма жамоа 18 та ўйин ўтказиб, 9 ғалаба, 5 дуранг ва 4 мағлубият қайд этди.

Кейруш фаолияти давомида "Спортинг", "Реал" клублари ва Португалия, Эрон терма жамоаларини бошқарган. Шунингдек, у беш мавсум мобайнида "Манчестер Юнайтед" бош мураббийи Алекс Фергюсонга ёрдамчилик қилган.