Қозоғистоннинг бразилиялик мураббийи ўзбекларга мурожаат қилди

Юртимиз мезбонлик қилаётган футзал бўйича жаҳон чемпионатида Қозоғистон терма жамоаси Испания футзалчилари билан 1:1 ҳисобида дуранг ўйнади.

Беллашувдан кейин Қозоғистон терма жамоасининг бразилиялик бош мураббийи Пауло Рикардо Кака ўз фикрларини билдириб ўтди.

- Мен натижадан норозиман. Биз бу ерга ғалаба учун келгандик. Мен йигитлар мураккаб вазиятдан чиқиб, ўйинни қутқариб қолишганидан фахрланаман. Бунақа шогирдларим борлиги омадим.

Ўзбекистоннинг бутун  халқига  алоҳида миннатдорлик билдиришни истайман. Биз ўзимизни уйдагидек ҳис қилдик. Бир биримизни қўллаб-қувватлаяпмиз.

Мен йигитларга трибунага келиб, Ўзбекистон терма жамоасига мухлислик қилишимни айтдим, - деди Пауло Рикардо Кака.

Қозоғистон терма жамоаси гуруҳда Ливия ва Янги Зеландия футзалчилари билан ҳам куч синашади.

Ўзбекистон мезбонлик қилаётган жаҳон чемпионати 6 октябрга қадар давом этади.