Қирғизистонлик мутахассис: "Ўзбекистон Суперлигаси Осиёдаги топ 5 чемпионатлардан бири"

Қўшни Қирғизистон чемпионатини кузатиб бораётган мухлисларимиз талайгина. Чунки у ерда кўплаб ўзбек футболчилари тўп суришяпти.

Мамлакат чемпионатида 2-ўринда бораётган “Алай” клубини ҳам юртимизда яхши билишади. Тез-тез ўзбек жамоаларига қарши назорат учрашувларини ҳам ўтказиб турадилар.

Жамоа бош мураббийи Рустам Ахунов ҳам чемпионатимизни доим диққат билан кузатиб келади.

Sports.uz журналисти ушбу мутахассисга айрим саволлар билан мурожаат қилди.

- Ўзбек жамоаларига қарши ўйинлар жамоангиз учун қанчалик фойдали?

- Ўзбекистон чемпионатини доим кузатиб бораман. Осиёнинг топ 5 чемпионатларидан бири. Ўзбекистон миллий терма жамоаси бежизга жаҳон чемпионатига чиққани йўқ. Бу уларни кучлигидан далолат беради. Бизга ҳам катта тажриба беради, деб ўйлайман. Ўзбек клубларига қарши ўйинлар орқали маҳоратимизни ошириб борамиз. Шунингдек, “Нефтчи” билан ҳам ўйинимиз бор. Бу биз учун жуда аҳамиятли ҳисобланади. Ушбу учрашувлар чемпионатда яхши қатнашишимизга замин яратади. Биринчиликни яхши тугатишимизга ҳам ёрдам беради. Бу жамоа қарийб бир ойдан бери ишлаяпман ва ўйин услубини ўзгартиришга ҳаракат қиляпмиз. Янгиликларни амалда синаб кўряпмиз. Доимий равишда Ўзбекистон чемпионатини кузатиб, таҳлил қилиб борамиз.   

- Қирғизистоннинг биринчи рақамли дарвозабони Эржан Токотаев “Андижон” шарафини ҳимоя қилиб келяпти. Унинг ўйинларини кузатяпсизми?

- “Андижон”нинг бизнинг дарвозабонимиз билан шартнома имзолаганлиги ҳақидаги хабарни эшитиб хурсанд бўлдик. Шуни алоҳида айтишим керакки, бизнинг футболчилар Ўзбекистон чемпионатида тўп суришса бундан хурсанд бўламиз. Ишонч билан айтаманки, Ўзбекистон Суперлигаси Осиёдаги топ 5 чемпионатларидан бири. Токотаев “Андижон”га фойда келтирса, бундан жуда мамнун бўламиз. Осиё Чемпионлар лигасида қатнашиш унинг учун ҳам ҳар томонлама тажриба бўлади, деб ҳисоблайман. Бу орқали эса уни миллий терма жамоамизга янада фойдаси тегади. Токотаевни ёшлар терма жамоасида ишлаганимдан бери яхши биламан. У бизда тахминан бир ойча шуғулланганди. Талабчан ва барчасини ўз вақтида бажаради. Эржан бугунги кунда миллий терма жамоамизнинг биринчи рақамли дарвозабони. Доим ўзига ишонч билан ўйнайди ва бу ҳолатда ҳимоячиларга ҳам енглироқ бўлади.

- “Алай” сафида бир қатор ўзбекистонлик футболчилар тўп суришяпти. Уларнинг фаолиятидан қанчалик қониқяпсиз?

- Биздаги ҳимоячи Илдар Маматказин “Андижон”да кўп йиллар тўп сурган. У тажрибали ва масъулиятли футболчи. Ҳозирги кунда бироз соғлиги билан боғлиқ муаммо бор. Шу сабабли унга ортиқча “нагрузка” беришни хоҳламадик. Яна бир қатор ўзбекистонлик ўйинчилар бор. Уларни анча муддат кузатдик ва эндиликда ишонч билдиряпмиз. Кузатган бўлсангиз, таркибимизда ёш ўйинчилар ҳам бор.

- Яна бошқа ўзбекистонлик футболчиларни ҳам “Алай” жамоасида кўришни хоҳлайсизми?

- Албатта, кўришни хоҳлайман.

- Масалан, кимларни?

- Чемпионатимиз ўзига хос, турли хил даражадаги ўйинчиларимиз бор. Биласизми, футбол бизда ҳам аста-секин ривожланиб боряпти. Шароит ва имкониятларни яратиб бераётгани учун федерациямиз раҳбарларига миннатдорчилик билдираман. 10 дан ортиқ янги стадионлар очилиш арафасида. Кучайишга ҳаракат қиляпмиз. Ўзбек футболчиларидан бир нечтасини жамоамизда кўришдан хурсанд бўлардик. Бунга вақт керак. Балки молиявий ёки бошқа сабаблар туфайли ўтишмаётгандир. Бу борада футболчи рози бўлса, олишимиз мумкин. Ўзбек футболчилари анча сифатли ўйин кўрсатишади. Мисол келтириш шарт эмас. Сизларни ўйинчиларингизни бутун дунёда яхши билишади. Абдуқодир Ҳусанов, Элдор Шомуродов ёки бошқаларни айтишимиз мумкин. Европа чемпионатларида яхши ўйинлар кўрсатишяпти.