Про лигада нима гаплар?

Охирги йилларда нуфузи ва мавқеи сезиларли кўтарилаётган про лиганинг жорий йилги мавсуми ҳам кўпчиликда қизиқиш уйғотаётгани бор гап.

Ҳеч кимга сир эмас, у ерда фаворитлар номи олдиндан маълум эди. Ҳозирча қандайдир кутилмаган сюрпризларсиз кутилган жамоалар турнир жадвалининг дастлабки поғоналарини банд этишни бошлашган.

Про лигада 7-тур ортда қолди. Ўтган йили Суперлига билан хайрлашган учлик бошқалардан ажралиб турибди. “Динамо” билан “Локомотив” 16 очко билан 1- ва 2-ўринларни бўлишиб туришган бўлса, “Қўқон-1912” улардан 5 очко кам жамғариб кучли учликда боряпти. Мусобақа жадвалини ҳозирча “Хоразм” билан “Ғиждувон” якунлаб турибдилар. Бу бироз кутилмаган ҳолат-а? Айниқса, “Хоразм”нинг чемпионатни кўнгилдагидек ўтказа олмаётгани ҳамда 4 очко билан 10-ўринда эканлиги ҳозирча про лигадаги кутилмаган ҳолатларнинг каттаси бўлиб турибди. Балки вақт ўтиб, урганчликлар ўзига келиб олар. Гарчи “Хоразм” 6 та учрашувда 1 ғалаба, 1 дуранг ва 4 мағлубият қайд этганига қарамай, бош мураббий Руслан Аҳмедовга ишонч билдирилмоқда. Лекин бошқа жамоаларда вазият бошқача тус олди. Гап шундаки, про лигада ҳам мураббийларнинг истеъфолари бошланди.

Кетма-кет иккита учрашувда бир дуранг ва бир мағлубиятга учраган қўқонликлар бош мураббий Даврон Файзиев билан хайрлашишга қарор қилдилар. Қўқонда асосий рақобатчиларидан бири “Локомотив” 10 футболчи билан ғалаба қозониб кетгани бош мураббийга ҳам жуда оғир ботди. Натижада унинг ўзи истеъфо сўради ва буни клуб раҳбарияти маъқуллади. “Қўқон-1912”га маҳаллий мутахассис Муҳсин Низомиддинов бош мураббий этиб тайинланди. Энди унинг зиммасига масъулиятли вазифа юклатилди. Куни кеча клуб раҳбари Акромжон Мамадалиев Sports.uz сайтига берган интервьюсида жамоани Суперлигага олиб чиқишга кафолат бера оладиган мураббий излаётгани ҳақида гапирганди. Афтидан, ўша мураббий Низомиддинов бўлиб чиқди, шекилли...

Яна бир истеъфо “Шўртан” клубида содир бўлди. Қизиғи, иккала истеъфо ҳам деярли бир вақтда ва битта стадиондаги ўйиндан кейин юз берди. Яъни, “Шўртан” жамоаси Қўқонда номинал мезбон вазифасини ўтаган “Андижон-SGS”га 3:2 ҳисобида аламли мағлубиятга учради. Боиси, ғузорликлар аввалига 0:2 ҳисобида олдинда эди. Аммо якунда ютқазди ва бу мағлубият раҳбариятга оғир ботди. Натижада Қўқондаги ўйиндан кейин Алексей Евстафеев лавозимидан озод этилди. Унинг ўрнини ёрдамчи мураббий сифатида ишлаб келган Анвар Бердиев эгаллади.

“Шўртан”нинг ҳисобида бунгача 5 ўйинда 2 ғалаба 1 дуранг ва 2 мағлубият бор эди. Кўриниб турибдики, Суперлига сингари про лигада ҳам ҳамма тезроқ натижани кутяпти. Бундай вазиятда бир-икки учрашувда жамоа қоқилдими, раҳбарият ва мухлислар узоқ кутмоқчи эмаслар. “Динамо” ва “Локомотив”да ҳозирча ишлар жойида. Иккала клуб мағлубиятсиз сериясини давом эттиришяпти.

Шуҳратбек Жўраев.