Про-лига клуби "Зомин" фаолиятини якунлаши мумкин!? Бунга сабаб нима? Жамоа спорт директори билан махсус интервью!

Юртимизда даража бўйича Суперлигадан кейин турувчи Про-лига мусобақаси қисқа муддатга танаффусга чиқди. Ҳозирда юқори ўринлар учун кураш авжида. Турнир ҳар томонлама мухлисларни шод эта олмоқда. Аммо...

Яқинда чиққан хабарларга кўра, сўнгги поғонадаги "Зомин" клуби ҳомийлар кўмагига муҳтож бўлиб қолган. Ҳатто жамоа иқтисодий қийинчиликлар сабаб фаолиятини тўхтатиши мумкин. SPORTS.uz сайти мухбири Шоҳрух Зоиров "Зомин" жамоаси спорт директори Акмал Раҳматуллаев билан шу масалага янада аниқлик киритиш мақсадида бир неча саволларни бериб ўтди. 

Марҳамат, қуйида жамоанинг ҳолати, нега инқироз ёқасига кириб қолгани ҳақида батафсил танишиб чиқишингиз мумкин. 

1. Маълум бўлишича, "Зомин" жамоаси ҳозир анча қийин даврларни бошдан кечирмоқда. Клуб молиявий инқироз ҳолатига тушиб қолган. Бунга айнан нима ёки нималар сабаб бўлди? Шу ҳақда батафсил гапириб берсангиз.

- Ҳа, жамоамиз молиявий томондан ҳозир қийин аҳволда. Шу вақтга қадар клубнинг расмий ҳомийси бўлмаган. Асосан, туман ва вилоят ҳокимлиги томонидан туманимизда спортнинг футбол турини оммалаштириш бўйича жамоамизга маблағ ажратиб келинган. Биз бир неча маротаба туман ва вилоят ҳокимлигига клубга маблағ ажратиш бўйича хат билан мурожаат қилдик. Аммо ҳозиргача натижа бўлмади. 2022 йилнинг дастлабки 3 ойида туманимиздаги кичик тадбиркор томонидан жамоамиз молиялаштирилган эди. Аммо бундан кейинги ойлар учун тадбиркорнинг маблағлари етмай қолди.

2. Агар янги ҳомий топилмаса, жамоа фаолиятига якун ясалиши ҳам мумкинми?

- Биз жамоани шунчаки маблағ бўлмагани учун фаолиятини тугатмоқчи эмасмиз. Жамоа раҳбарияти билан келишган ҳолда мавсум сўнггига қадар қандай бўлмасин, Про-лигада қолмоқчимиз. Тўғри, ўтган йилги мавсумда биз "Оқтепа" ва "Истиқлол"нинг Про-лига мусобақасини охирига етказмай, маълум сабабларга кўра ёпилганлигини кўргандик. Биз бу йўлдан кетмоқчи эмасмиз. Чунги жамоанинг Про-лигада иштирок этиши учун барча шароитлар яратилган.

Бизда футбол клублари учун зарур бўлган база ва стадион бор ва энг асосийси, жамоанинг содиқ мухлислари бор. Шунинг учун, биз туман ва вилоят хокимлигининг ҳомийлик қилишини кутиб ўтирмоқчи эмасмиз. Ўзимиз жамоани Про-лигада сақлаб қолиш учун Республикамиздаги тадбиркорларга "Зомин" футбол клуби учун хомийлик қилиш бўйича мурожаат қилдик. Қисқа вақтларда ҳомий топилмаса, жамоамиз муддатидан олдин мусобақани тарк этади.

3. Билишимизча, клуб учун анча сифатли стадион фойдаланишга топширилган. Бу жиҳат "Зомин"нинг молиявий қийинчиликка тушиб қолишида қанчалик таъсир кўрсатди?

- "Зомин марказий ўйингоҳи" 2020 йилда фойдаланиш учун топширилган эди. Лекин ўйингоҳ жамоага тегишли эмас. Стадион туманимиздаги "Болалар ва ўсмирлар спорт мактаби" балансида. Биз бу ўйингоҳдан фақатгина ижара шартномаси асосида машғулотлар ва ўйин кунида фойдаланамиз. Қолган вақтда БЎСМнинг барча спорт тури тарбияланувчилари фойдаланишади.

4. Шунда жамоа ўз стадионига эга эмас. Шунақами?

- Ҳа, стадион "Зомин" футбол клуби балансида эмас. Лекин стадион қурилаётганда фақат футбол клуб эмас, балки барча ёшлар спорт билан шуғулланишини ҳисобга олиниб, БЎСМ балансига киритилган сабаб стадион атрофида спортнинг 10 тури бўйича бино ва иншоотлар жойлашган. Шуларни инобатга олиб, ўйингоҳ БЎСМга берилган. Аммо "Зомин" футбол клуби ва клуб таркибидаги барча ёшлар жамоалари стадиондан фойдаланмоқчи бўлганда ҳеч қанақа муаммога дуч келмайди.

5. Шу пайтга қадар клубни туман ҳокимияти молиялаштириб келганини айтдингиз. Ҳозирги вақтда пул билан таъминлаш масаласи ҳокимият томонидан рад этилдими ёки бошқа сабаблар ҳам борми?

- Ҳокимият томонидан жамоани молиялаштириш ишлари олиб борилмоқда. Бу бўйича клуб рахбарлари алоҳида шуғулланмоқда. Лекин биз клубни туман ва вилоят ҳокимлигига қарам қилиб қўймоқчи эмасмиз. Клубимизни туман ва вилоятдаги молиявий томондан салоҳиятли тадбиркорларга бириктириб берилишини сўраяпмиз. Яъни жамоани давлат ташкилотидан ҳусусий ташкилотга айлантирмоқчимиз. Жамоани ҳусусий клуб қилмоқчимиз.

6. Аслида, клуб ташкил этилишидан кўзланган мақсад нималардан иборат эди? Нималарга эришилди ва келажак учун яна қандай режалар бор?

- Асосий мақсад - туманимизда спортнинг футбол турини оммалаштиришдир. Лекин яна бир мақсад бор, бу стадионга келган 1000 ёки 2000 инсоннинг уйига бир ҳафтада бир марта бўлса ҳам завқ олиб киришдир. Агар жамоамиз ғалаба қазонса, ўша куни стадионга келган минглаб инсонларнинг уйида ҳақиқий байрам бўлади. Бу ҳақиқий мақсаддир. Жамоа ўтган йили 11 та жамоа иштирок этган Биринчи лига мусобақаларида иштирок этиб, гуруҳда 1-ўринни эгаллади ва бу йилдан Про-лига мусобақасида иштирок этмоқда. Қайд этиш лозим, жамоамиз илк бора Биринчи лига мусобақаси ғолибига айланди.

Келажакдаги режалар аниқ. Зомин туманимиздан Миржалол Қосимов, Одил Аҳмедов, Элдор Шомуродов каби маҳоратли футболчиларни миллий терма жамоага тарбиялаб бериш ва бу орқали Ўзбекистон байроғини янада юқорига кўтаришдир.

7. "Зомин"нинг қарздорликлари, футболчиларга тўланадиган маошлар борасида маълумот бериб ўтсангиз. 

- Клубимизнинг 3 ойдан буён футболчилар ва ишчилар олдида қарздорлиги бор. Футболчиларнинг ўз вақтида маош олмаслиги жамоанинг кетма-кет мағлубиятга учрашига асосий сабаблардан бири бўлмоқда. Буни Про-лига мусобақа жадвалида ҳам кўриш мумкин. Шу сабаб биз тадбиркорларга ҳомий бўлиш бўйича мурожаат қилдик.

8. Клуб мутасаддилари олдида Жиззахнинг бош жамоаси, ҳозирда мамлакат чемпионлиги учун курашаётган "Сўғдиёна" жамоасидан ёрдам сўраш варианти ҳам мавжудми?

- "Сўғдиёна" Суперлига ва ОФК кубогида яхши иштирок этмоқда. Биз бу жамоадан иккала мусобақада ғолиб бўлишини тилаб қоламиз. "Сўғдиёна" билан биз доимо ҳамкорликда ишлаб келганмиз. Ҳозирда ҳам жамоамиз таркибида  улардан 1 нафар футболчи ижара асосида ҳаракат қилмоқда. Футболчилар борасида биз доимо "Сўғдиёна" жамоасидан ёрдам сўраганмиз.

- Ҳомий тадбиркорга биз жамоа орқали ўзнинг ишлаб чиқариш маҳсулотларини стадионда ва футболчиларнинг футболкалари орқали бепул реклама қилиб бера оламиз. Сабаби ПРО-лига мусобақалари Футбол ТВ ва Узрепорт ТВ каналлари орқали жонли олиб борилмоқда. Бу асосий бепул рекламадир. Келажакда ҳомийнинг брендларини жаҳонга ҳам олиб чиқишимиз мумкин.

ЯНА БИР БОР БАРЧА ТАДБИРКОРЛАРНИ ЎЗ КЕЛАЖАКЛАРИНИ "ЗОМИН" ФУТБОЛ КЛУБИ ОРҚАЛИ ҚУРИШГА ВА ҲАМКОРЛИКДА ИШЛАШГА ЧАҚИРИБ ҚОЛАМИЗ.

 

Шоҳрух Зоиров суҳбатлашди.