Барчамизга маълумки, Ўзбекистон сўнгги йилларда қитъа миқёсидаги йирик турнирларга мезбонлик қилиб келмоқда ва ўз навбатида мазкур халқаро мусобақалар орқали ўзбекистонлик футбол мутахассисларининг кўникма ва малакалари ўсиб бормоқда.
Қатарда ўтадиган Осиё кубоги мусобақасида Осиё футбол конфедерацияси делегацияси таркибида фаолият олиб бориш мақсадида Ўзбекистон футбол ассоциациясининг бир қатор мутахассислари чақирув олди. Хусусан:
- Мусобақалар ва тадбирлар ўтказиш бўлими бошлиғи Муҳаммад Содиқ Содиқ-Охунов — Мусобақа бош офисида аккредитациядан ўтказиш бўйича координатор;
- Мусобақалар ва тадбирлар ўтказиш бўлими бошлиғи ўринбосари Ёқубжон Сохибов — “Жассим бин Ҳамад” стадионида маркетинг масалалари бўйича менежер;
- Мусобақалар ва тадбирлар ўтказиш бўлими мутахассиси Санжар Ҳайдаров — стадионларда ахборот-кўнгилочар тизими координатори;
- Маркетинг ва медиа бўлими мутахассиси Ислом Рўзиев — ОФК расмий фотосуратчиси сифатида фаолият олиб боради.
- Қитъанинг энг асосий мусобақаси ташкилий қўмитасидан Лигамиз мутахассислари ҳам жой олди. Хусусан, клубларни лицензиялаш ва халқаро алоқалар бўлими бошлиғи Зоҳиржон Акрамхонов мусобақа доирасидаги ўйинолди ва ўйин кунги медиа тадбирларни ташкиллаштириш учун, мусобақалар ўтказиш бўлими бош мутахассиси Жаҳонгир Раҳматуллаев эса "Эдьюкейшн Сити" стадионини учрашувларга ҳозирлаш учун масъул бўлади.
Шунингдек, SPORTS.uz сайти раҳбари Азамат Умаров "Ал-Жануб" стадионида трансляция менежери сифатида фаолият олиб боради.