Ўзбекистон терма жамоаси қай тарзда мағлубиятга учради? Рақибга нималарда ютқаздик?

"Бунёдкор" стадионида 23 ёшгача футболчилар ўртасидаги финал баҳси ўтказилди. Ўзбекистон олимпия терма жамоаси Саудия Арабистони билан куч синашди. Беллашув қандай кечгани борасидаги барча жараён билан танишинг.

Биз финагача барча рақибларни ўз жарима майдонида ушлаб тургандик. Бугун бизга Саудия шу усулни қўллади, дастлабки дақиқаларда. Мухлислар энг катта кучимизга айланди. Аммо бу футболчиларимизга босим юклагани ҳам бор гап.

Ўйин аҳамияти юқорилигидан Саудия Арабистони олимпия терма жамоасига миллий жамоадан 23 ёшгача 2 нафар футболчи жалб қилинди. Бу уларнинг мақсади қай даражада эканлигини кўрсатди.

Рақиб анча бақувват эканлиги боис яккакурашларда устунлик қилди. Бу беллашувда ҳам асаблар синалди.

Тўпни олдинги чизиқ вакилларига етказиб беришда муаммолар кўзга ташланди. Аввалги боғлиқликни рақибнинг таянч ярим ҳимоячилари узиб қўйди.

Аввалги учрашувларда чап фанотимиз фаол эди. Бу сафар негадир ўнг қанотга таяндик ёки чап томонни саудияликлар ёпип қўйди. Саидазамат Мирсаидов пасларда кўп хатога йўл қўйди.

Илк хавфли вазиятимиз 32-дақиқада юзага келди. Ҳожимат Эркинов шериги ташлаб берган тўпни дарвозага йўллаш учун кучли тепди. Натижада тўп анча олисдан ўтиб кетди.

Рақиб ҳам бунга тезкорлик билан жавоб қайтарди. Қарши ҳужумда жарима майдони ташқарисидан Сауд Абдулҳамид дарвозабонимизга анча қийинчилик туғдирди.

Тайм охирида дарвозамиз томон пенальти белгиланди. Футболчимиз рақибни йиқитганди. Бироқ унгача бўлган вазиятда ўйиндан ташқари ҳолат қайд этилгани боис ВАРни кўрган бош ҳакам қарорини ўзгартириб, пенальтини бекор қилди.

49-дақиқада саудияликлар ниятига эришди. Аҳмед Мазен Алгамди жарима майдони чизиғидан дарвозанинг юқори бурчагини аниқ нишонга олиб, ҳисобни очди.

60-дақиқага қадар Ҳусаин Норчаев бирор марта тўғри позиция танлай олмади, тўп учун курашларда деярли ютиб чиқмади. Жасур Жалолиддиновнинг заряди тугаб қолган шекилли аввалги босқичларда. Оёғини кўтариши қийин бўляпти. Ҳожимат Эркинов эса қанотларни алмаштирса ҳам фойда бермади.

Шу фикримни ёзиб бўлишим билан Жалолиддинов ўзини эслатиб қўйди. Японияга ургандек, узоқ масофадан дарвозани ўққа тутди. Бироз аниқлик етмади.

71-дақиқада терма жамоамиз аъзоси гол урганди. Аммо ўйиндан ташқари ҳолат қайд этилди.

Орадан кўп вақт ўтмай 74-дақиқада марказда тўпни тўхтатишдаги техник хато қимматга тушди. Натижада юзага келган ҳужумдан Ферас Албрихон жарима майдони ичидан чап оёқда моҳирлик билан пастги бурчакни ишғол қилди – 0:2.

89-дақиқада бурчакдан тўпни оширилган вазиятда футболчимиз дарвозага тўғрилаб қўйгандек эди. Бироқ посбон тўпни ушлаб олди.

Оғир майдонда шундоқ ҳам чарчаб қолган футболчиларимиз ўзларини кўрсата олмади. Етакчилар масъулиятни ола олмади.

Шу тариқа, Саудия Арабистони олимпия терма жамоаси 23 ёшгача футболчилар ўртасидаги Осиё Кубоги соҳибига айланди. Саудияликлар мусобақани гол ўтказмасдан якунлади.

 

Бекзод ИСАЕВ