Ўзбекистон Қозоғистондан кучли, лекин бу футболчи Шомуродов билан бир хил даражада!

Жорий йилнинг 16 ноябрь куни Ўзбекистон миллий терма жамоаси “Пахтакор” стадионида Қозоғистон миллий терма жамоаси билан халқаро ўртоқлик учрашувида куч синашади. ОФК ва УЕФА вакилларининг ўзаро баҳси ҳар икки мамлакат футболи билан яхши таниш бўлган мутахассислар эътибор марказида турибди.

Қозоғистоннинг https://vesti.kz сайти ҳар икки мамлакат жамоаларини бошқарган россиялик мураббий Виктор Кумиковнинг бўлажак ўйин ҳақидаги фикрлари билан қизиқди.

Виктор Кумиков мураббийлик фаолияти давомида Қозоғистоннинг “Есиль”, “Елимай”, “Қайсар”, “Шахтёр”, “Ордабаси”, “Атирау” клубларида ишлаган.

Айни пайтда “Андижон” футболчиларига устозлик қилаётган тажрибали мутахассис миллий чемпионатимизда “Машъал”, “Насаф” ҳамда АГМК жамоаларидаги ишлари билан ҳам мухлисларимизга яхши таниш.

Кумиков 2014-2015 йиллар давомида Қозоғистон миллий терма жамоасига бош мураббий қилган Юрий Красножан штабида ҳам ишлаган.

- Ўзбекистонда бу каби учрашувлар кўп ташкил этилмайди ва шундан келиб чиқиб, Қозоғистонга қарши ўйинга жуда катта қизиқиш бўлади ва стадион мухлислар билан тўлади, деб ўйлайман.

Агар Ўзбекистон миллий терма жамоаси хорижда тўп тепаётган ўйинчиларини жалб қилиб, оптимал таркибини йиғса, менинг назаримда Қозоғистондан кучлироқ бўлади. Умуман олганда, ғар икки терма жамоанинг кучи тахминан тенг, лекин футболчиларнинг сифати ва хорижда ўйнаётган ўйинчилар борасида Ўзбекистон юқори, қолаверса улар ўз уйида ўйнаши ҳам устунлик беради.

Элдор Шомуродовдан ташқари яна кимни алоҳида кўрсата оламан? Отабек Шукуров, Иброҳимхалил Йўлдошев, Жалолиддин Машарипов. Мана шу футболчиларни таъкидлашни истайман, агар улар ўйинга келса, жамоани сезиларли кучайтиришади, булар жиддий ўйинчилар.

Бахтиёр Зайнутдинов ва Элдор Шомуродовни таққослаш мумкинми? Ўйлашимча, ҳа. Зайнутдинов ва Шомуродов деярли тенг даражадаги ўйинчилар. Лекин улар майдондаги позицияси, фазифаси бўйича бир биридан кескин фарқ қилади, бироқ уларнинг савия ва даражаси бир хил.  Зайнутдинов ҳам Европанинг катта чемпионатларида ўйнай олади, - деди Виктор Кумиков.

Ўзбекистон ва Қозоғистон миллий терма жамоалари ўзаро олти маротаба тўқнаш келган. Шу учрашувлардан иккитасида ҳамюртларимиз, биттасида қўшниларимиз қўли баланд келган. Яна учта баҳсда кучлар тенг келган.

Шомуродов яққол ажралиб турибди!

“Рома”га қимматга тушган баҳсда Шомуродовнинг ўйини қандай баҳоланди?

Моуриньо Шомуродовни нега ўйнатмаётгани маълум бўлди

Шомуродов, тайёрлан!