Ўзбекистон Қатарни неча марта ютган? Бу гал нима бўлади?
- 14-ноябр 2024, 08:09
- Zohir Toshxo’jayev
- 1
- Футбол
2026 йили АҚШ, Канада ва Мексика мезбонлик қиладиган жаҳон чемпионатининг Осиё минтақаси саралаш турнири учинчи босқичи 5-турида Ўзбекистон миллий терма жамоаси сафарда Қатар футболчилари билан куч синашади.
Сречко Катанец шогирдлари А гуруҳидаги дастлабки тўртта турда учта ғалаба ва битта дуранг қайд этган ва Эрон футболчилари билан бирга биринчи ўринни бўлишиб турибди.
Ноябрь ойида Қатар ва КХДР билан бўладиган сафар учрашувларидаги ижобий натижалар ҳамюртимизни жаҳон чемпионатига янада яқинлаштиради.
Қатар бу босқичда мухлису мутахассислар ишончини тўлиқ оқлаяпти дейиш қийин. Араблар тўртта ўйинда биттадан ғалаба ва дуранг қайд этиб, тўрт очко билан тўртинчи ўринда бормоқда.
Умуман олганда, Ўзбекистон миллий терма жамоаси Қатардан кучли ҳисобланади ва бўлажак баҳсда ҳам ижобий натида қайд этиши кутиляпти. Ўзаро беллашувлар статистикаси ҳам ўзбек футболчиларининг устунлигини акс эттирган.
Статистакага ихтисослашган wildstat.ru сайтининг маълум қилишича, Ўзбекистон ва Қатар терма жамоалари ўзаро 15 маротаба тўқнаш келган. Беллашувлардан 9 тасида ўзбеклар, учтасида қатарликларнинг қўли баланд келган, уч маротаба кучлар тенг келган. Тўплар нисбати ҳам 25 га 14, ўзбеклар фойдасига.
Қатар фақатгина ФИФАнинг жорий рейтингида Ўзбекистондан юқорида холос ва бу арабларнинг ягона устунлиги ҳисобланади. Жаҳон рейтингида Қатар 35-қаторда, Ўзбекистон 62-поғонада қайд этилган.
Яна бир статистик портал – soccer365.ru экспертларининг маълум қилишича, Ўзбекистон ва Қатар футболчилари илк бор 2000 йилнинг 14 октябрида Осиё кубоги доирасида ўзаро тўқнаш келган ва унда кучлар тенг келган.
Бир йилдан кейин жаҳон чемпионати саралашида футболчиларимиз ўзаро рақобатдаги иккита баҳсдан дастлабки ғалабасини қўлга киритган ва иккинчисида яна дуранг қайд этилган.
Қолган беллашувларнинг аксариятида марказий осиёлик ўйинчилар устунлик қилган.
Ҳар икки терма жамоанинг ўзаро охирги рақобати йил бошида Қатарда ўтказилган Осиё кубоги чорак финалига тўғри келди. Ўйиннинг асосий ва қўшимча бўлимларида кучлар тенг келди – 1:1. Пенальтилар сериясида омад мезбонларга кулиб боқди.
Кейинчалик Қатар терма жамоаси ўз майдонларида ўтказилган қитъа чемпионати ғолибига айланди ва ўз тарихида иккинчи маротаба Осиё кубогини қўлга киритди.
Ўзбекистон ва Қатар ўртасидаги баҳс 14 ноябрь куни Доҳа шаҳрида бўлиб ўтади ва Тошкент вақти билан 21:15 да бошланади.
Бўлажак беллашувда Ўзбекистон миллий терма жамоасига омад ва муваффақият ёр бўлишини тилаб қоламиз!
Ҳурматли мухлислар сизнингча учрашув натижаси қандай бўлади? Фикрингизни изоҳларда қолдиринг...
Шомуродов Римга қайтгунича “Рома” унга сюрприз тайёрлаб қўяди!
Бош мураббийсиз қолган “Рома” Шомуродов ва яна бир неча футболчига жавоб бериб юборди