Ўзбекистон мундиалда балки энг “митти иштирокчи” билан ўйнар...
- 19-ноябр 2025, 11:00
- Ali Ahmadxo’jayev
- 0
- Футбол
2026 йили Шимолий Америк мамлакатлари – АҚШ, Мексика ва Канада мезбонлик қиладиган навбатдаги жаҳон чемпионати ҳали бошланмай туриб, сенсацияларга бой бўлмоқда.
Илк бор 48 мамлакат терма жамоалари жалб қилинаётган мундиалда бир неча терма жамоалар ўз тарихида илк бор футбол оламининг энг нуфузли мусобақасида қатнашадиган бўляпти.
Хусусан, Осиё қитъасидан Ўзбекистон ва Иордания, Африкадан Кабо-Верде илк бор мундиалга йўлланма олди. Энди дебютантлар қаторига КОНКАКАФ минтақасининг мураккаб саралаш турниридан муваффақиятли ўтган Кюрасао миллий терма жамоаси ҳам қўшилди.
23-жаҳон чемпионати мезбонлари – АҚШ, Канада ва Мексиканинг мусобақадаги жойи кафолатлангани боис ФИФА раҳарияти КОНКАКАФ минтақасининг қолган мамлакатларига учта тўғридан тўғри ўрин ва қитъалараро плей-оффда қатнашиш учун яна иккита йўлланма ажратди.
Кюрасао терма жамоаси жаҳон чемпионатига чиқиш мақсадида 2024 йилнинг январида машҳур мураббий Гус Хиддинк билан ҳамкорлик ўрнатди ва терма жамоага “Аякс” ва “Ньюкасл” клубларидаги ўйинлари билан танилган Вюрнон Анитани жалб қилди.
Кюрасао терма жамоаси мундиалда ўйнаш ҳуқуқини қўлга киритиш учун уч босқичли саралаш турниридан ўтишига тўғри келди. Мусобақага иккиничи раунддан қўшилган кюрасаоликлар ўз гуруҳидаги тўртата учрашувда зафар қучиб, биринчи ўринни эгаллади.
Ҳал қилувчи учинчи босқичда бу жамоа Ямайка, Тринидад ва Тобаго, Бермуд ороллари миллий терма жамоалари билан рақобатлашишига тўғри келди. Уй-сафар тизимида ўтказилган бу босқичда жаҳон чемпионатига тўғридан тўғри йўл олган жамоа номи охирги турда аниқланди.
Унда учта ғалаба ва иккита дуранг билан биринчи ўринда турган Кюрасао футболчилари бир очко кам жамғарган Ямайка терма жамоаси меҳмони бўлди. Ўта қийин ўтган бу баҳсда кюрасаоликлар ўзлари учун зарур бўлган дуранг натижани ушлаб қолди ва тарихда илк бор жаҳон чемпионатига ўйнайдиган бўлди.
Кюрасао йўлланма олиши билан жаҳон чемпионати рекордчисига айланди. Яъни, Кюрасао жаҳон чемпионатлари тарихида бу мусобақада иштирок этган аҳоли энг кам мамлакат ҳисобланади. Орол мамлакатда бугунги кунда 156 минг киши яшамоқда.
Бу “митти мамлакат” Кариб денгизи ҳавзасида, Венесуэла яқинида жойлашган ва 2010 йилдан бери Нидерландия қироллиги таркибига киради.
“Америка – сеҳрли диёр” дейишганидек, ким билсин, балки Ўзбекистон миллий терма жамоаси Шимолий Америка яшил майдонларида ўтказиладиган жаҳон чемпионатида айнан эксклюзив иштирокчи Кюрасао футболчиларигарўбарў келар...