Ўзбекистон кубоги. "Эски қадрдонлар" йўли яна кесишди

Кеча Ўзбекистон кубогининг саралаш босқич учрашувлари якунига етди. Унга кўра, "Жиззах" ва "Олимпия" клублари гуруҳ босқичида иштирок этиш масаласини қўлга киритди.

Биз икки мавсумдан буён бир гуруҳдан жой олиб келаётган жамоалар бўйича қизиқарли маълумотлар йиғишга қарор қилдик. Улар қайси клублар экани сизга ҳам қизиқ экани аниқ. Қайд этиш лозим, мухлис ва мутахассислар наздида "эски қадрдонлар" кесишган бу галги турнир янада қизиқарли ўтиши кутилмоқда. 

Ўтган йилги гуруҳ босқичининг график кўриниши.

Бу йилги гуруҳ босқичининг график кўриниши.

"B" гуруҳи. "Машъал" - "Қўқон-1912".

Иккинчи гуруҳда воҳа ва водий клублари яна ўзаро тўқнаш келади. "Машъал" бу мавсум ҳам Про-лигада иштирок этаётган бўлса, "Қўқон-1912" Суперлигадан қуйи дивизионга "саёҳат қиляпти". Қизиғи, бу жамоалар жорий мавсум Про-лиганинг иккинчи турида ҳам куч синашиб кўрди. Унда "учар тулпорлар" "газчилар"ни кичик 1:0 ҳисобида мағлуб этди. Ўтган йилдаги кубок ўйинида ҳам қўқонликлар йирик 4:0 ҳисобида зафар қучган.

Кўрамиз, бу гал муборакликлар ушбу мағлубиятлар учун реванш ола билармикин?!

"C" гуруҳи. "Металлург" - "Бунёдкор".

"Маъданчилар" "қалдирғочлар"га қарши. Икки клуб ўзаро ўйинларда майдонни "ёндириш"ни жуда ажойиб тарзда эплайди. Масалан, ўтган мавсумдаги кубок гуруҳ босқичидаги баҳсда дарвозаларга оз эмас, кўп эмас нақ 6 та тўп киритилган. Унда омад Тошкент шаҳри вакилларига кулиб боққан - 4:2. 

2022 йилги Суперлига доирасида ўтказилган бу клублар тўқнашувида битта дуранг ва битта "Бунёдкор"нинг ғалабаси қайд этилган. "Қалдирғочлар" майдонида ўтган баҳс 1:1 ҳисобида якун топган бўлса, Бекободдаги учрашув 2:1 ҳисобида меҳмонлар ғалабаси билан якун топган. 

Голлар билан мухлисларни хурсанд қиладиган бу беллашувда кимга омад кулиб боқишини тез орада билиб оламиз.

"D" гуруҳи. "Турон" - "Шўртан".

Яна бир воҳа ва водий клублари тўқнашуви. "Турон" Про-лигадан юқори дивизонга йўлланмани қўлга киритган бўлса, "Шўртан" қуйи лигада муваффақият қозона олмади. 2022 йилда бўлиб ўтган ўзаро ўйинларда устунлик яйпанликлар томонида. Улар ўтказилган барча 3 ўйинни ўз фойдасига ҳал қилган. Тўплар нисбати ҳам сезиларли даражада - 7:2. 

Кўриб турганингиздек, "Турон" учун "Шўртан" қулай рақиб ҳисобланади. Аммо ушбу мавсумда "оқ бўрилар" "қасос олиш" имкониятига эга.

"E" гуруҳи. "Динамо" - "Қизилқум".

Икки қўшнилар ўртасидаги қизиқарли ўйин. Бу баҳсда мухлислар кескин курашлар гувоҳига айланиб келган. Икки учрашув 0:0 ҳисобида якунланган бўлса, яна бир беллашув 4:1 ҳисобида навоийликларнинг ғалабаси билан тугаган. 

Дерби мақомига тенглашиб қолган бу жамоалар ўртасидаги ўйин шиддат борасида ҳеч кимни хафа қилиб қўймаса керак...

"E" гуруҳи. "Локомотив" - "Зомин".

"E" гуруҳининг навбатдаги жуфтлиги ҳам бир-бирига бегона эмас. "Темирйўлчилар" ва "бўрилар" ўтган йилги кубок гуруҳ босқичида ўзаро куч синашган. "Локомотив" фаворит саналган учрашув кутилмаганда 2:2 ҳисобидаги дуранг натижа билан ниҳоясига етган. Бу сафар "Локо" Про-лигада ўша дуранг учун реванш олмоқчи бўлди. Аммо энди "Зомин" Биринчи лигага тушиб кетишга улгурганди. "Том ва Жерри" мултфилмида мушук сичқонни қувгани каби пойтахтликлар яна Зомин клубига қарши саф тортадиган бўлди. Бу гал ҳам сенсация гувоҳи бўламизми ёки йўқ, тез орада бунга жавоб оламиз.

 

ЎзПФЛ маълумотлари асосида Шоҳрух Зоиров тайёрлади.