Осиё Крикет Кенгаши вакиллари Ўзбекистон Крикет федерацияси фаолиятини муносиб баҳолади

Оммавийлиги жиҳатдан футболдан кейин иккинчи ўринда турадиган, осиё ва олимпия ўйинлари таркибидан жой олган крикет спорт турининг мамлакатимизда тобора ривожлантириш боришида Ўзбекистон крикет федерацияси томонидан бугун изчил ишлар амалга оширилмоқда.

Жорий йилнинг 23-24 августь кунлари Ўзбекистон крикет федерациясига ташриф буюрган Осиё крикет кенгаши вакиллари юртимизда  крикет спорт тури бўйича амалга оширилаётган ишлар, мавжуд спорт иншоотлари, пойтахтимизда жойлашган крикет академияси ва Қибрай туманидаги крикет стадионида шуғулланаётган ёшлар билан учрашувлар ўтказди.

Кеча 24 августь куни эса мазкур ўрганишлар, мулоқот ва танишувлар якунига бағишлаб, Осиё крикет кенгаши вакиллари саналган Сингапур крикет ассоциация президенти Маҳмуд Ғазнавий, Бирлашган Араб Амирилиги крикет кенгаши бош операцион директори Субҳан Аҳмад, Ўзбекистон крикет федерацияси раиси Азиз Михлиев, федерация кенгаши аъзолари, мураббий-мутахассислар иштирокида йиғилиш ўтказилди.

Муҳокамалар давомида халқаро ҳамкорлик алоқаларини янада ривожлантириш, ўзбекистонлик крикетчиларнинг нуфузли мусобақаларда, хусусан, Осиё ва ёзги Олимпия ўйинларида, қитъа ва жаҳон чемпионатларида, халқаро турнирларда иштироки, семинарлар, ўқув-машғулот йиғинларини ташкил этиш, крикет жиҳозлари билан таъминлаш каби бир қатор мавзулар таҳлил этилди.

Шунингдек, Осиё крикет кенгаши вакиллари мамлакатимизда фаолиятини бошлаган Олимпия шаҳарчаси инфратузилмаси крикет ривожига ҳам салмоқли таъсир кўрсатишини, ўзбекистонлик крикетчиларнинг техник-тактик маҳорати йилдан йилга ўсиб бораётганлигини алоҳида таъкидлаб ўтишди.

Айниқса, Ўзбекистон крикет федерация тўлақонли иш олиб бораётганлиги, Ўзбекистон давлат жисмоний тарбия ва спорт университетида крикет факультети фаолият бошланиб, бу борада кадрлар тайёрлашга эришилгани юксак ғалабалар йўлида муносиб пойдевор қўйилаётганлигидан далолат эканлигини айтиб ўтишди.

Таъкидлаш жоиз, Ўзбекистон крикет федерацияси яқинда Осиё крикет кенгашига расман аъзо сифатида қабул қилинган эди. Демак, мамлакатимизда крикет спорт тури янада ривожланиши айни ҳақиқат.

ЎКФ матбуот котиби Илҳом РАҲМОНОВ тайёрлади