Ўрунов "Спартак"га қайтади, кейин эса...
- 29-апрел 2022, 19:13
- Zohir Toshxo’jayev
- 0
- Футбол
Россия премьер-лигасидаги легионерларимиздан бири Остон Ўруновни кейинги мавсумни қайси жамоада ўтказиши ҳамон мавҳум бўлиб турибди.
Аслида легионеримиз Москванинг “Спартак” жамоаси аъзоси ҳисобланади. Остоннинг пойтахтликлар билан амалдаги шартномаси ҳали яна уч йил давом этиши керак.
Таббийки, “Спартак”нинг ўзи ҳозирги пайтда Ўруновнинг тақдирини ҳал қиладиган ҳолатда эмас. Чемпионлик илинжида бош мураббийни кетма-кет алмаштираётган клуб премьер-лига жадвалида ўнинчи қаторда юрибди.
Катта умидлар билан олиб келинган Паоло Ваноли шогирдлари бу мавсум премьер-лигадаги 15 та рақибидан саккизтаси – “Рубин”, “Нижний Новгород”, “Сочи”, ЦСКА, “Зенит”, “Краснодар”, “Локомотив” ва “Ростов”га имкониятни бой берди.
Россиялик журналистлар мамлакатнинг энг машҳур клубида ўйнай олмаган Остон Ўрунов ҳақида кўп савол беришади.
Куни кеча, championat.com сайти вакиллари “Уфа” бош директори Шамиль Газизовдан мавсум охирида ижара муддати тугайдиган ўзбекистонлик футболчининг келажаги бўйича савол беришди.
- Остон Ўрунов келажаги бўйича бир қарорга келганимиз йўқ. Бу масалани мавсус якунланиши арафасида ҳал қилмоқчимиз. Остон атрофидаги қолган гап-сўзларнинг ҳеч қандай аҳамияти йўқ, - деб жавоб берди Шамиль Газизов.
“Спартак” ва “Уфа” ўртасидаги келишувга кўра, Остон мавсум охиригача уфаликлар сафида ижара асосида ўйнайди. Ёзда “Уфа” легионеримизни бир миллион еврога сотиб олиш ҳуқуқига эга.
Бундан ташқари, агар Ўрунов мавсум давомида 60 фоиз ўйинларда қатнашганида “Уфа”ликларга уни сотиб олиш мажбурияти юкланарди. Амалда бундай бўлмади. Остон жароҳатлари ва спорт формасидаги муаммолар туфайли атиги 12 марта майдонга тушди ва жами 520 дақиқа ҳаракат қилди. Бирорта самари ҳаракатни ҳам амалга ошира олмади.
Ўруновнинг ўйини ва ҳолати “Уфа” бош мураббийи Алексей Стукаловни қониқтираётгани йўқ. Шу боис, бу мутахассис ўзбекистонлик ярим ҳимоячини “Спартак”дан трансфер қилинишига қарши чиқиши мумкин.
Агар “Уфа” мавсум якунигача бу масалани ҳа қилмаса, Ўрунов ёзда “Спартак” ихтиёрига қайтиб боради. Катта эҳтимол билан москваликлар уни асосий таркибга яқинлаштирмайди. Улар Ўруновни тўлиқ сотиб юбориб, шартномасидан қутилишга ҳаракат қилади.
Ўрунов “Пахтакор” тарбияланувчиси ҳисобланади. Профессионал футболчи сифатида “Навбаҳор”даги ўйинлари билан мухлису мутахассислар эътиборига тушган. Кейинчалик Тошкентнинг “Локомотив” жамоасида тўп тепди.
Остон 2020 йилнинг февралидан Россия премьер-лигасида юрибди. У Россияда “Спартак” ва “Уфа” жамоалари шарафини ҳимоя қилган.
Остон Ўрунов 2019 йили Ўзбекистон миллий терма жамоасидан таклиф олди. Бош жамоа сафида беш марта майдонга тушган ярим ҳимоячи кейинги пайтда ўқув-машғулот йиғинларига ҳам чақирилмаяпти.