Ўрунов “қариялар” ичида қолиб кетди
- 1-октябр 2021, 18:02
- Zohir Toshxo’jayev
- 1
- Футбол
Асли Москванинг “Спартак” клубига тегишли бўлган Остон Ўрунов жорий мавсумни ижара асосида “Уфа”да ўтказаётганидан хабарингиз бор.
Уфаликлар таркибига қўшилганидан кейин атиги икки марта майдонда кўриниш берган легионеримиз кейинчалик кўздан ғойиб бўлди. Яқинда “Уфа” бош директори Шамиль Газизов ўзбекистонлик ярим ҳимоячининг бармоғи сингани ҳақида маълумот берганди.
Куни кеча, Ўрунов жароҳатидан қутилиб, яна умумий гуруҳ машғулотларига қайтгани хушхабар сифатида эълон қилинди.
Халқаро спорт тадқиқотлар маркази яқинда Россия премьер-лигасидаги жамоаларда ўйнаётган футболчиларнинг ўртача ёшини аниқлаш бўйича тадқиқот ўтказди ва натижаларини эълон қилди.
Унга кўра, премьер-лиганинг энг ёш жамоаси сифатида “Крилья Советов” футболчилари тан олинди. Бу жамоа вакилларининг ўртача ёши 24,84 ни ташкил қилди. Самараликлардан кейинги ўринлар пойтахт клублари – Остон Ўруновга жавоб бериб юборган “Спартак” (25,34 ёш) ва “Динамо” (25,83) жамоаларига насиб этди.
Россия чемпионатидаги энг ёши катта футболчиларни жамлаган жамоа “Сочи” бўлиб чиқди. Курорт шаҳар жамоаси шарафини ҳимоя қилаётган ўйинчиларнинг ўртача ёши 29,12 ёшни ташкил қилди.
Иккинчи ўриндан мамлакат чемпионлигини ҳеч кимга бермай келаётган “Зенит” жой олди. Питерликлар таркибининг ўртача ўртача ёши 28,51га тенг экан.
“Уфа” бу борада кучли учликдан жой олди. Уфаликлар жамоасидаги футболчиларнинг ўртача ёши 28,11 ёш бўлиб чиқди.
Бошқирдистон жамоасидаги энг ёши катта футболчилар дарвозабон Александр Беленов, ҳимоячилардан Боян Йокич, Александр Сухов ва ярим ҳимоячи Олег Иванов экан. Уларнинг барчаси 35 ёшни уриб қўйибди.
Остон Ўрунов уфаликлар таркибидаги энг ёш икки футболчидан бири. 20 ёшли ҳамюртимиз жамоада фақатгина 17 яшар Данил Ахатовдан катта экан. Россия миллий терма жамоасидан таклиф олган “Уфа” тўпурари Гамид Агалов ҳам эндигина 21 ёшни қарши олган умидли футболчилардан ҳисобланади.
“Уфа” Россия премьер-лигасида тўққизта учрашувдан иккитасида ғалаба қозонган, яна икки марта дуранг ўйнаган ва беш бора имкониятни бой берган. Ҳозирча, Остон Ўрунов жамоаси 8 очко билан 12-ўринда бормоқда.
Уфаликлар 2 октябрга белгиланган ўнинчи тур учрашувида ўз майдонида чемпионат аутсайдери “Урал”ни қабул қилади. Жароҳатидан қутилган Остон Ўрунов бир неча ҳафталик танаффусдан сўнг, айнан мана шу беллашувда майдонга тушиши кутилмоқда.