“Оилангиз ва яқинларингиз учун доимо ҳаракатда бўлинг!”

Шу кунларда беларуслик машҳур пара сузувчи, мотивацион тренер, хайрия жамғармаси асосчиси Алексей Талай юртимизда меҳмон бўлиб турибди.

Бугун пойтахтимиздаги “Ўзбекистон” халқаро форумлар саройида Ўзбекистон Республикаси Мактабгача таълим вазирлиги ҳамда Ўзбекистон Миллий паралимпия қўмитаси ҳамкорлигида Алексей Талай иштирокида мотивацион-тренинг ташкил этилди. Унда паралимпия спортчилари, алоҳида таълим эҳтиёжлари бўлган болалар учун ихтисослаштирилган мактаб-интернатлари тарбияланувчилари, Республика Олимпия ва Паралимпия спорт турларига тайёрлаш маркази ўқувчилари, Ўзбекистон давлат жисмоний тарбия ва спорт университети талабалари ҳамда паралимпия тренерлари иштирок этди.

Тадбирнинг очилиш қисмида Спортни ривожлантириш вазири Адҳам Икрамов, Осиё Паралимпия қўмитаси вице-президенти – Ўзбекистон Миллий Паралимпия қўмитаси раиси Мухторхон Ташходжаев, Ўзбекистон Миллий Олимпия қўмитаси Бош котиби Ойбек Касимов ҳамда Ўзбекистон дзюдо федерацияси раиси Азизжон Камилов иштирок этди. Унда сўз олган Адҳам Икрамов сўнгги йилларда давлатимиз раҳбари бошчилигида аҳоли саломатлиги мустаҳкамлаш, айниқса жисмоний имконияти чекланган ва ногиронлиги бўлган инсонлар ўртасида паралимпия спорт турларини оммалаштириш борасида тизимли ишлар амалга ошириб келинаётганини алоҳида таъкидлади.

Тренинг давомида Алексей Талай ўзининг босиб ўтган машаққатли ва ибратли ҳаёт йўли, эришган ютуқлари ҳақида сўзлаб берди. Тадбирнинг иккинчи қисми эса савол-жавоб тарзида давом этди.

Алексей Талай мотивацион-тренингни қуйидаги сўзлар билан якунлади: “Оилангиз ва яқинларингиз учун доимо ҳаракатда бўлинг!”.