"Очиғи, бош мураббийнинг жавобидан ҳайрон қолдим" ёхуд Бахтиёр Ашурматов Катанец ҳақида: "Мухлисларимизнинг меҳрини қозониш осон иш эмас"

Хабарингиз бор, Ўзбекистон миллий терма жамоаси Жанубий Кореядаги йиғинга йўл олди. У ерда вакилларимиз Камерун ва Коста Рикага қарши ўртоқлик учрашувларида қатнашади.

Маълум танаффусдан сўнг яна тўпланган терма жамоамиз барчамининг эътиборимизда. Шунинг учун бош мураббий Сречко Катанецнинг танлаган таркиби, матбуот анжуманидаги фикрлари ва унинг ўйин услуби қизғин баҳс-мунозараларни келтириб чиқаряпти.

Юртимиздаги кўзга кўринган мураббийлардан бири Бахтиёр Ашурматов ҳам терма жамоа масаласида ўз қарашларини айтди.

Камерун ва Коста Рикага қарши ўйинларнинг биз учун фойдали томонлари қандай?

- Ўзбекистон терма жамоаси учун Камерун ва Коста Рика каби рақибларга қарши ўйинлар ўтказиши жуда фойдали. Терма жамоамизнинг савиясини Катанецнинг бир йил давомида қанақа иш олиб борганини, термамиз Катанец хоҳлаган ўйин услубиин қандай ўзлаштирганини, таркибимиздаги йигитларимиз салоҳиятини билиб олиш учун шунақанги кучлиб рақиблар билан ўйнаш керак, деб ҳисоблайман. Таиланд, Шри-Ланка сингари Осиё жамоалари билан учрашувларда жамоа ўйинига аниқ баҳо бериш мушкул. Ўзбекистон терма жамоалар марказининг ўртоқлик учрашувлари учун шундай кучли рақиблар топишгани ҳам мақтовга лойиқ. Жонкуяр мухлисларимиз ҳам савияли рақибларга қарши ўйинлар орқали ўзларини қизиқтирган кўп саволларга жавоб олиш имкониятига эга бўлишади. Бу ўйинларда терма жамоамиз футболчиларига омад тилаб қоламан.

Катанецнинг матбуот анжуманида айтган барча фикрларига қўшиласизми?

- Катанец иштирокидаги матбуот анжуманини ўқидим. Унинг жавобларини, фикрлариин таҳлил ва танқид қилиш фикридан йироқман. Яхши савиядаги мураббийлиги учун унга Ўзбекистон терма жамоаси бош мураббийлигини топширишган. Таркиб танлашни, қанақа ўйин услубида терма жамоани ўйнатишини, қай тарзда тайёргарлик кўришини унинг ўзига қўйиб беришимиз керак. Уни қўллаб-қувватлашимиз даркор. Лекин битта жавобига қўшилмаган бўлардим. Терма жамоада рақобат бўлиши керак эмас, деб айтган. Лекин мени фикримча, рақобар ҳар доим, ҳар қайси жамоада, ҳар қандай спорт турида ва ҳар бир соҳада бўлиши керак. Рақобат бор жой ўсиш бўлади.

Рўйхатга киритилмаган футболчилардан қайсилари муносиб?

- Бу йилги мавсумда чемпионатда ўзини ҳар томонлама кўрсатаётган бир нечта футболчилар терма жамоа таркибидан тушиб қолганлар. Булар қаторига Беларусь чемпионатида ўйнаётган Бобур Абдуҳолиқов, “Навбаҳор”даги Жамшиб Болтабоев ёки Жамшид Искандеров, “Сўғдиёна”дан Жўрабеков ва Норхоновни ҳам қўшишимиз мумкин. Лекин терма жамоа таркибини бош мураббий ҳал қилади. Ўзининг ўйин услубига мос бўлган ўйинчиларни таклиф қилади. Балки бу футболчилар қайсидир критериялар бўйича бош мураббийнинг услубига мос тушмагани учун ҳам чақирилмагандир. Буни Катанецнинг ўзи билади ва ўзи ҳал қилади. Эътибор қилган бўлсангиз, терма жамоамизда ёки бошқа жойда қайси мураббий ишлашидан қатъий назар барибир қайсидир ўзини яхши кўрсатиб турган футболчилар таркибдан тушиб қолган. Буни биз тўғри қабул қилишимиз ҳамда мураббийга ишонч билдиришимиз керак. Чунки натижага бош мураббий жавоб беради. Ўйин услубини у ташкиллаштиради. Тўғри, агар жаҳон чемпионатига чиқмасак, Ўзбекистон терма жамоаси муваффақиятли қатнашмаса бундан футболимиз зарар кўради ва яна мухлисларимиз азият чекади. Лекин футболимиз раҳбарлари Катанецни терма жамоамизга муносиб номзод кўришган экан, биз уни қўллашимиз керак ва танлаган таркибини қабул қилишимиз керак, деб ҳисоблайман.

Алоҳида мавзуга айланган Жамшид Искандеров тўғрисида

- Тан олиш керак, Жамшид Искандеров бу йил “Навбаҳор” таркибида ўзининг яхши мавсумларидан бирини ўтказяпти. У мухлисларга ёқадиган футбол намойиш қиляпти. Ажойиб паслари билан ажралиб турибди. Рақиб дарвозаларига бир нечта чиройли голларни ҳам урди. Ўз ўйини билан терма жамоага чақирилишга муносиб номзод эди. Айтиб ўтганимиздек, таркибни терма жамоа бош мураббийи Сречко Катанец ҳал қилади. Буни тўғри қабул қилиш керак. Аммо гапнинг очиғи, Искандеров ҳақидаги саволга берган жавобидан ҳайрон қолдим. Бошида менимча нотўғри таржима қилинган бўлса керак, деган фикрга бордим. Чунки айтайлик, футболчининг бўйига қараб таркиб танланадиган бўлса, мухлислар ҳам кўплаб фиклар билдиришяпти. Журналистлар ҳам муносабатларини айтишяпти. Дунё футболида паст бўйли яхши савиядаги футболчилар жуда ҳам кўп. Майли, Мессини кўшмайлик, у катта иқтидор эгаси. Ўзимизни футболда ҳам Сервер Жепаров бўйи паст бўлишига қарамасдан яхши савияда футбол ўйнаган. Миржалол Қосимов ҳам жуда бўйдор бўлмаган. Лекин улар ақл ва юракдан ўйнашган. Хави, Иньеста, Канте...Бундай ўйинчилар кўплаб топилади. Шунинг учун бўйи пастлиги учун терма жамоага чақирилмади, деган фикрга қўшилмаган бўлардим. Футболда фақат бўйи билан эмас, балки ақл билан ҳам ўйналади. Футболчи ажойиб паслари билан ҳам терма жамоага жалб қилиниши мумкин. Балки Жамшид мураббийнинг қандайдир услубига мос келмагани учун чақирилмагандир.

Бош мураббийнинг ўйин услубида янгилик кўряпсизми?

- Катанецнинг ўйин услубида қандай янгиликлар борлигини Камерун ва Коста Рика каби кучли терма жамоалар билан ўйинларда кўриб олишимиз мумкин. Ҳурмат қилган ҳолда айтамизки, барибир Таиланд терма жамоаси Осиёнинг грандлари қаторида эмас. Бундай учрашувларда холис баҳо бериш қийин эди. Аниқ баҳони натижалар ва ўйин услубига қараб жонкуяр мухлисларимиз беришади. Агар ишқибозларнинг меҳрини қозона олса, шунда Катанец яхши савиядаги мураббий эканлигини исботлай олади. Бизнинг мухлисларнинг меҳрини қозониш осон иш эмас. Яхши натижалардан ташқари чиройли футбол ҳам кўрсатиш керак. Чунки Ўзбекистонда футболни яхши тушунишади, қадрлашади ва севишади. Катанец рақибларини қанақа тактик янгиликлари билан ҳайрон қолдира олганини вақт ўтганидан кейин билиб оламиз. Умид қиламанки, мураббий ўзбек мухлисларининг меҳрини қозонади ва барчамизда ўчмас из қолдира олади. Бу йўлда унга омад тилайман.