“Ньюкасл”: Ҳеч ким сенга ваъда бермаган!

“Ньюкасл” матбуот хизмати клубдан норозилик билдириб, ўз фикрларини ижтимоий тармоқлар орқали тарқатган ҳужумчи Александр Исаакка жавоб қайтарди.

- Александр Исаакнинг ижтимоий тармоқдаги “чиқишлари”дан ҳафсаламиз пир бўлди. Бунга жавобан шуни маълум қиламизки, Алекснинг клуб билан амалдаги шартномаси бор ва клубда ҳеч ким унга шу ёз “Ньюкасл”дан кетишини кафолатламаган.

Биз энг зўр ўйинчиларимизни сақлаб қолмоқчимиз, шунинг баробарида футболчиларнинг ҳам шахсий истаклари борлигини бидамиз. Албатта, уларнинг фикрига ҳам қулоқ тутамиз.

Биз Алекснинг ўзига ҳам, унинг агентларига ҳам ҳар қандай қарор қабул қилишда биринчи навбатда “Ньюкасл Юнайтед”, жамоа ва мухлислар манфаатлари устун туришини айтдик. Биз трансфер шартлари бу ёз ҳам ўзгармай қолишини аниқ тушунтирдик.

“Ньюкасл” ўз анъаналарига эга бўлган мағрур клуб ва бу ерда биз оила муҳитини сақлаб қолишга ҳаракат қиляпмиз. Алекс оиламизнинг бир аъзоси, унинг қайтишидан хурсанд бўламиз, жамоадошлари қаторига қайтишни истаса, эшигимиз очиқ, - дейилади клуб баёнотида.

Эслатиб ўтамиз, Исаак клубдагилар унинг ишончини йўқотганини  ва бундай шароитда ҳамкорлик қилинмаслигини иддао қилганди.