Ноёб факт: Ҳусанов аввал “Олд Траффорд”да ўйнаб кетган!
- 22-январ 2025, 02:00
- Zohir Toshxo’jayev
- 0
- Футбол
Ниҳоят, Абдуқодир Ҳусановнинг “Манчестер Сити”га трансфери расман эълон қилинди. Эътироф этиш керакки, 20 ёшли ўзбек футболчиси Англиянинг амалдаги чемпиони сафига бориб қўшилиши кутилмаган воқеа бўлди.
Ўзбек футболчисини 100 минг еврога олган “Ланс”нинг бир ярим йилдан кейин ўз кашфиётини 500 баравар қимматига “Манчестер Сити”га ўтказгани ҳақиқатан шов-шувли трансфер бўлди.
Энди ўзбек футболи ишқибозлари иқтидорли легионеримизнинг Хосеп Гвардиола қўл остида асосий таркибда ўйнаб кетишидан умидвор. Зеро, жаҳоннинг энг мураккаб ва айни пайтда энг обрўли лигасида тўпиш осон эмаслигини барча яхши билади.
Sports.uz портали имкониятдан фойдаланиб мухлислар эътиборига Абдуқодир Ҳусановнинг футболдаги фаолиятига доир қизиқарли ва аниқ фактларни ҳавола этади.
Демак танишинг:
Абдуқодир Ҳусановга бир пайтнинг ўзидан “топ-5” лигаларининг барчасидан 20 яқин клубдан қизиқиш бўлди. Улар орасида "Реал Мадрид" ҳам бор эди.
* * *
Абдуқодир бобосининг фамилиясини олган. Отаси – собиқ футболчи Ҳикмат Ҳошимов уни ортиқча босимдан ҳимоялаш учун фамилиясини ўзгартирган.
* * *
Беларусга 16 ёшида келган ва вояга етгунга қадар икки йил давомида шунчаки машғулотларда қатнашиб юрган.
* * *
Ҳусанов аслида таянч ярим ҳимоячиси ва профессионал фаолиятидаги илк клуби “Энергетик-БГУ”да ҳимоя марказига ўтказилган.
* * *
“Энергетик-БГУ”да жисмоний тайёргарлиги юқори бўлгани учун Франция чемпионатига тез мослашганини алоҳида эътироф этган.
* * *
Ҳусанов 20 ёшгача футболчилар ўртасида Осиё чемпиони.
* * *
Халқаро футбол ҳамжамияти эътиборига 20 ёшгача бўлган футболчилар ўртасидаги жаҳон чемпионатида тушган.
* * *
Жаҳон чемпионатида ўзини кўрсатган Абдуқодир Ҳусановни биринчи бўлиб “Манчестер Юнайтед” скаутлари пайқаган, лекин клуб менежменти бу трансферга тўсқинлик қилган.
* * *
“Ланс” бош мураббийи Уилл Стилл Абдуқодирни Олимпия ўйинларида бошқа спорт турларида ҳам мусобақалашиши мумкинлигига ишонади.
* * *
Ҳусанов бугунги кунда энг тезкор ўзбек футболчиси. Тезлиги соатига 37 километр.
* * *
Абдуқодир 2023 йили “Ланс”нинг мавсумолди йиғинида “Манчестер Сити”нинг ашаддий рақиб “Манчестер Юнайтед” аренаси “Олд Траффорд”да тўп тепган. Ўша учрашув 3:1 ҳисобида мезбонлар фойдасига ҳал бўлган. Ҳусанов ўйиннинг 85-дақиқасида Жонатан Градит ўрнига захирадан майдонга тушган.
* * *
Илк бор Ўзбекистон терма жамоаси билан Париж Олимпиадасида иштирок этди.
* * *
Ҳусанов Франция чемпионатида биринчи ўзбек футболчиси.
* * *
Абдуқодир Англия Премьер-лигасидаги илк ўзбек ҳимоячиси.
* * *
Легионеримиз Европанинг “топ-5” лигаларидан иккитасида ўйнаган ягона ўзбек футболчиси.
* * *
Трансфермаркт порталига кўра, 12 миллион евро билан Ўзбекистон ва Марказий Осиёнинг энг қиммат футболчиси.
* * *
“Манчестер Сити” жами 50 миллион евро тўлагани боис “Ланс” тарихидаги энг қиммат трансфер эгаси.
Абдуқодир Ҳусанов ҳақидаги факт ва қизиқарли маълумотларни яна узоқ давом эттириш мумкин. Давомини легионеримиз Англия Премьер-лигасидаги дебютидан кейин санаймиз...
“Топ-5” лигаларида ўйнай оладиган ўзбек футболчилари рўйхати эълон қилинди!