"Насаф"ни ўз трансфер тарихи, бизнинг ҳам ўзига хос тарихимиз бор" ёхуд Левченко Сайфиев ва Ҳамробеков масаласида нима деди?

Айни пайтда Суперлига иштирокчилари трансфер ойнаси очилганидан фойдаланиб ўз таркибларини кучайтириш ишларини фаол тарзда олиб бормоқдалар.

Фарғонанинг “Нефтчи” клуби ҳам янги мавсум учун жиддий равишда кучайиш ҳаракатида ва иккита тенг кучли таркибни ҳосил қилишмоқчи. Шу боис бош мураббий Виталий Левченкога бир қатор саволлар билан мурожаат қилдик.

- “Нефтчи” трансфер ойнасида фаол. Таркиб неча фоизга тайёр ва яна нечта трансфер қолди?

- Трансфер кампанияси росаям қизғин паллага кирган ва биз яна иккита чизиқни кучайтириш ниятидамиз.

- Сиз Ўзбекистоннинг 2023 йилдаги энг яхши мураббийига айландингиз. Рақобатчиларингиз совринлар ютган мураббийлар эди ва уларнинг орасида сиз энг яхшиси бўлишингизни кутганмисиз?

- Бу мен учун мутлақо кутилмаган иш бўлди, аммо бундай нуфузли совринни қўлга киритиш ёқимли, албатта.

- “Пахтакор” тарафидан Фарруҳ Сайфиев “Нефтчи”га кетишига розилик билдирди, деган гаплар чиқди. Сиз бу хабарни тасдиқлай оласизми?

- Бизда номзод футболчилар рўйхати унчалик кўп эмас, аммо ҳали шартнома имзоламаган ўйинчилар ҳақида гапириш - ёқимли иш эмас.

- Шунингдек, “Пахтакор”дан Одил Ҳамробековга “Насаф”, “Навбаҳор” ва “Нефтчи” жиддий қизиқаётганини эшитяпмиз. Уни қўлга киритиш имкониятингиз қанчалик?

- Тажрибали ўйинчиларга кўплаб клублар қизиқиш билан қарашади, лекин бизни қайси ижрочи қизиқтириб қолгани хусусида фикр билдиришни истамаган бўлардим.

- Яна бир савол Ботирали Эргашев билан боғлиқ. Қувватов, Кенжаев, Тўраев ва Эргашев. Шунча дарвозабон нега керак?

- Барча чизиқларимизда катта рақобат бўлади ва малакали дарвозабонга эга бўлиш - менинг назаримда, ажойиб иш бўлади! Ким кучли бўлса, ўша ўйнайди.

- Туркиядаги йиғинда қайси рақибларга қарши ўйинлар ўтказилади?

- Биринчи йиғин учун ўйинчиларни рўйхатга олиб бўлганмиз, фақат айрим майда-чуйда нарсалар қолди холос. Бу ҳақда сизга кечрок хабар берарман.

- “Насаф”нинг трансфер бозоридаги харидлари сизни ҳам қизиқтиряптими?

- “Насаф” жамоасида ўз трансфер тарихи, бизнинг ҳам ўзига хос тарихимиз бор. Ҳаммасини мавсум ва майдондаги ўйинлар белгилаб беради.

Шуҳратбек Жўраев.