"Насаф" мен ўйнаган энг совриндор клуб" - "Аждарлар"ни тарк этган Лима Круз яна нималар деди?

Сўнгги икки мавсум “Насаф” шарафини ҳимоя қилган бразилиялик ҳужумчи Матеус Лима Круз расман клубдан кетгани маълум бўлди. Бу хусусида жамоа матбуот хизмати хабар тарқатди.

Лима Круз қаршиликлар билан хайрлашгач, Sports.uz журналисти бразилиялик ҳужумчи билан суҳбатда бўлди.

- Дастлаб, “Насаф”дан кетганингиз ҳақида сўрамоқчиман. Буни ўзингиз хоҳладингизми ёки...

- Биз жамоа билан яхши вақт ўтказдик. Иккала томон ҳам қарордан ва эришилган ютуқларимиздан хурсандмиз.

- “Насаф”даги икки йиллик фаолиятингиз нимаси билан эсда қолди?

- Биргаликда ютган 3 та титулимиз, Кубок финалидаги охирги голим, ўйлашимча, бу мавсумда бир қанча муҳим голлар уришга эришдим.

- Режангиз қандай? Олдингизда аниқ таклифлар борми?

- Ҳозирча фақат Бразилияда дам олиш ҳақида ўйлаяпман. Кейинроқ Худо менга келажак учун нималарни тайёрлаб қўйганини кўрамиз.

- Ўзбекистонда “Насаф”дан ташқари яна қайси жамоада ўйнашни ёқтирасиз?

- Ҳар қандай клуб муҳим, мен профессионалман ва жамоаларни ажратиб ўтирмайман.

- Клубдаги энг яқин дўстингиз ким ва жамоа билан хайрлашишга улгурдингизми?

- Бундай жамоадошларим кўп. Лекин айниқса, легионерлар билан яқин эдим. Шунингдек, Ойбек, Акмал, Азиз ва Жавоҳир ҳақида ҳам шундай дея оламан. Чунки улар инглизчада гапира олардилар.

- Фаолиятингиз давомида бир қанча клубларда ўйнагансиз. Улар орасида “Насаф” нимаси билан ёдингизда қолди?

- Ўйлашимча, “Насаф” мен ўйнаган энг совриндор клуб бўлди. Жамоа билан бир йил ичида учта Кубок ютдик.

- Бундан буён қандай мақсад учун курашмоқчисиз?

- Ҳозирча билмайман. Агентим кейинроқ таклифларни кўриб чиқади ва менга маълум қилади. Кейин эса биргаликда қарор қабул қиламиз.

Шуҳратбек Жўраев.