Моуриньони Римдан олиб кетишмоқчи
- 8-ноябр 2023, 10:31
- Zohir Toshxo’jayev
- 0
- Футбол
Саудия Арабистонининг “Ал-Иттиҳод” клуби португалиялик бош мураббий Нуну Эшпириту Сантунинг истеъфосидан кейин унинг ўрнини эгаллайдиган мутахассис қидирмоқда.
Сантунинг лавозимидан олинишига жамоасининг Осиё Чемпионлар лигасида Ироқ жамоасига ютқазиб қўйгани сабаб бўлди. Бу мутахассис ўтган йили жамоани мамлакат чемпионлигига олиб келганди.
Журналист Руди Галеттининг ёзишича, саудияликлар асосий номзод сифатида “Рома”ни бошқараётган Жозе Моуриньони танлаган.
Моуриньо илгари “Реал”да Карим Бензема билан ишлаган. Франциялик форвард “Реал”дан кетганидан кейин “Ал-Иттиҳод” сафига қўшилди ва ҳозир бу жамоанинг етакчи ўйинчиси ҳисобланади.
“Рома”да 2021 йилнинг ёзидан бош мураббийлик қилаётган Жозе Моуриньонинг амалдаги шартномаси мавсум охирида тугайди. Тажрибали мутахассис римликларни Европа Чемпионлар лигасига олиб чиқишни уддалай олмади. Шу боис, раҳбарият у билан ҳамкорликни узайтирмасликка қарор қилган.