Мбаппе ПСЖда умрбод қолиши мумкин эди

Килиан Мбаппе фаолияти охиригача Франциянинг ПСЖ клубида ўйнашга қарши бўлмаган. Бу ҳақда футболчининг ўзи гапириб берди.

- Мен ПСЖда етти йил ўйнадим, бу мен учун катта шараф. Бу ҳақида етарлича айтмаганим ёки кўрсатмагандирман, бироқ, бу ерда эканлигимни ва клубнинг нақадар буюклигини доимо англардим. Мен ҳар доим Франциянинг энг йирик клуби ва дунёдаги энг яхши клублардан бири эканлигини таъкидлаганман.

Ҳозир дунёнинг энг катта клубидаман. Ҳар доим айтганимдек, бу ПСЖни тарк этишимга сабаб бўлувчи ягона клуб эди.

Агар "Реал"га ўта олмаганимда, ПСЖда умрбод қолган бўлардим. У ерда ўйнаш орзуим эди ва мен бахтиёрман. Албатта, ПСЖ ўйинларини кузатишни давом эттираман, жамоада дўстларим бор ва ҳозир улар жуда яхши натижа кўрсатяпти, - деди ҳужумчи.

Маълумот учун, франциялик ҳужумчи ёзги трансферлар ойнасида "қироллик клуби" таркибига эркин агент сифатида келиб қўшилган эди.