Мбаппе Франциянинг энг “бағрикенг” ўйинчисига айланди
- 6-июн 2025, 14:20
- Zohir Toshxo’jayev
- 0
- Футбол
УЕФА Миллатлар лигаси ярим финалидан ўрин олган Испания ва Франция терма жамоалари ўртасидаги учрашувда мухлислар тўққизта голга гувоҳ бўлди.
Бу учрашувда 5:4 ҳисобида испанларнинг қўли баланд келди ва улар финалга чиқди. Францияликлар эса, Германия терма жамоаси билан учинчи ўрин учун курашади.
Беллашувда Килиан Мбаппе тарихий натижа қайд этди. Жамоадоши Райан Шеркига голли пас узатган Мбаппе Франция терма жамоаси тарихида энг кўп ассист қайд этган ўйинчига айланди.
Шеркининг голидан кейин Килианнинг халқаро миқёсдаги учрашувлардаги голли паслари сони 31 тага етди. Мбаппе бу кўрсаткич бўйича машҳур ҳужумчи Антуан Гризманни битта ассистга ортда қолдириб кетди.
26 ёшли Мбаппе ҳали миллий жамоада узоқ муддат фаолият юритиш имкониятига эга эканини инобатга олсак, ҳали бу кўрсаткичлар кўп бора янгиланади.