Машҳур юлдузнинг пешонасига ўзбеклар билан ўйнаш ёзилган экан...
- 5-сентябр 2024, 23:09
- Zohir Toshxo’jayev
- 1
- Футбол
Европа футболида трансфер бозори расман ёпилганига қарамай, ҳали трансфер ойнаси очиқ лигаларга футболчи жўнатиш амалиёти давом эттирилмоқда.
Хусусан, Ўзбекистон миллий терма жамоаси сардори Элдор Шомуродов ўйнаётган “Рома” ҳам ортиқча ўйинчилардан қутилиш мақсадида бир неча чиқиш трансферларини уддалади.
Кетганлар орасида юлдузли даврларини “Манчестер Юнайтед”да ўтказиб, 2019 йилдан бери “Рома” шарафини ҳимоя қилиб келган таниқли марказий ҳимоячи Крис Смоллинг ҳам бор.
Рим клубида Элдор Шомуродов билан бирга ўйнаган англиялик юлдуз “Рома”ни Даниэле Де Росси қабул қилиб олганидан кейин асосий таркибдаги жойини йўқотди.
Бир неча йил Рим клуби ҳимоя чизиғини бошқариб келган 34 ёшли Смоллинг энди Европа футболини тарк этишига тўғри келди.
“Рома” расмий сайтининг маълум қилишича, англиялик чарм тўп устаси фаолиятини Саудия Арабистони чемпионатида давом эттиради.
“Ал-Фейҳа” клуби машҳур ўйинчини тўлиқ трансфер қилди. Ҳозирча, бу трансфер қанчага тушгани ҳақида маълумот чиқарилган йўқ.
Трансферларга ихтисослашган transfermarkt.world араблар Крис билан 2026 йилнинг ярмигача давом этадиган шартнома тузгани қайд этилган.
Смоллинг “Рома”даги беш йиллик фаолияти давомида жами 155 та учрашувда иштирок этиб, ҳимоядаги вазифаларини бажаришдан ташқари, рақиблар дарвозасини 10 маротаба ишғол қилган ва жамоадошларига тўртта голли пас узатган.
Ҳимоячи Рим клубида фақат бир соврин – УЕФА Конференциялар лигаси кубогига сазовор бўлди.
Аслида Даниэле Де Росси бошчилигидаги мураббийлар штаби ёзда клубни тарк этадиган ўйинчилар рўйхатига Элдор Шомуродовни ҳам киритган эди. Бироқ легионеримизнинг машғулотлардаги фаол ҳаракати, “Эмполи”га қарши ўтказилган учрашувдаги ўйини ва урган голи бош мураббий фикрини ўзгартириб, ҳамюртимизга Италия пойтахтида қолиш имконини берди.
Крис Смоллинг эса, янги жамоасида Ўзбекистон терма жамоасининг бошқа вакили Отабек Шукуров билан тўп тепадиган бўлди.
Туркия Суперлигасида “Фотиҳ Карагюмрюк” ва “Кайсериспор” жамоалари шарафини ҳимоя қилган Отабек Шукуров янги мавсумда жамоасини ўзгартиришга қарор қилди. “Кайсериспор”да етарли ўйин амалиётига эга бўлмаётган ҳамюртимиз клубни тарк этишни маъқул кўрди.
“Ал-Фейҳа” ўзбек ярим ҳимоячисини трансфер қилиш учун турк клубига 400 минг евро миқдорида бадал пули тўлади.
Таъкидлаш жоизки, араб футболи 28 ёшли легионеримиз учун бегона эмас. Отабек Туркияга йўл олгунга қадар тўрт йили бошқа араб мамлакати – Бирлашган Араб Амирликлари чемпионатида “Шаржа” клубида тўп тепган.
Унинг янги жамоаси “Ал-Фейҳа” Саудия Арабистони профессионал лигаси аутсайдери ҳисобланади. Энди Отабек Шукуров номдор ҳамкасби Крис Смоллинг билан ҳамкорликда жамоани мусобақа жадвалида юқори кўтаришга ҳаракат қилади.