“Манчестер Сити” Ҳусановдан кейин яна бир трансферни уддалади
- 15-январ 2025, 11:05
- Zohir Toshxo’jayev
- 0
- Футбол
“Манчестер Сити” қишки трансферлар даврида фаоллик кўрсатишда давом этади. Клуб мутасаддилари “Ланс”дан олинаётган Абдуқодир Ҳусановнинг трансферини ижобий ҳал қилганидан кейин иккинчи нишон – Умар Мармушга ўтди.
Журналист Фабрицио Романонинг маълум қилишича, мисрлик форвард трансфери бўйича “Манчестер Сити” ва “Айнтрахт” ўртасидаги музокаралар ҳал қилувчи якуний босқичда. Томонлар келишувни янги ҳафтада имзолайдиган бўляпти.
Манбага кўра, 25 ёшли тўпурар “шаҳарликлар” билан шахсий шартнома бўйича келишувга эришиб бўлган.
Хосеп Гвардиола мисрлик форвард ёзда “Атлетико”га ўтиб кетган аргентиналик ҳужумчи Хулиан Альвареснинг ўрнини тўлдиришига ишонмоқда.
Умар Мармушнинг ўзи Бундеслигада гол уришни давом эттиряпти. Чемпионатнинг 16-турида унинг ягона голи жамоасига “Санкт-Паули” устидан ғалаба келтирди. 2025 йилда илк тўпини киритган ҳужумчи жорий чемпионатдаги 16-ўйинида голлари сонини 14 тага етказиб олди. Унинг ҳисобида саккизта ассист ҳам бор.