Маҳмуд Муҳаммаджонов : "Мен буни чарчоқ билан боғламаган бўлар эдим"

Равшан Ҳайдаров бошқарувидаги Ўзбекистон U20 терма жамоаси Осиё кубогидаги илк ўйинида Сурияни (2:0) таслим этганидан хабарингиз бор. Баҳс якунлангач, учрашув қаҳрамонларидан бири - Маҳмуд Муҳаммаджонов билан суҳбат уйиштирдик.

Аввало ғалаба билан табриклаймиз. Ўйин ҳақида фикрларингиз?

- Раҳмат. Барчамиз бугунги ғалабадан жуда ҳам ҳурсандмиз. Бугунги 3 очко бутун жамоамизники. Йигитлар биргаликда жамоавий ўйин намойиш этишга ҳаракат қилдик.

Бу ўйинда олдинга камроқ чиқдингиз. Бу мураббийнинг кўрсатмаси эдими?

- Тўғриси, ўйин аввалида эҳтиёткорликка катта эътибор қаратинг. Биринчи ўйин бўлгани боис, босим бор эди. Ўйиннинг илк дақиқаларида майдонга мослашдик ва ўзимизга ишончимиз ортди. Яъний, ўйин темпига тушиб олдик. Кейин секин-аста темпни кўтардик. Якунда, керакли 3 очкони қўлга киритдик.

Баҳс аввалида Сурия жисмонан биздан кучлироқдек кўринди, бироқ якунда улар чарчаб қолди. Сизларда чарчоқ аломати сезилмадими?

- Мен буни чарчоқ билан бўгламаган бўлар эдим. Биринчи навбатда жамоамиздаги кўп йигитлар ҳали катта футболда ҳаракат қилмаган. Айниқса, бундай атмосферадаги аренада уларга икки хисса қийин бўлди. Юқорида таъкидлаганимдек биринчи ўйин босими охиригача бизга таъсир кўрсатди. Ҳаммаси биргаликда барибир ўйинимизга таъсир қилди. Йигитлар ҳам бироз толққандек кўринди. Насиб қилса, кейинги ўйинларда хатолар устида ишлаб, бундан ҳам кучлироқ бўлиб қайтамиз.

Бугун "Бунёдкор" деярли тўлди. Ўйин атмосфераси ёқдими?

- Албатта. Ҳаммаси аъло даражада бўлди. "Бунёдкор"да, бундай ишқибозлар қўллаб-қувваташини ҳис қилганимиздан жуда ҳам хурсандмиз. Бугун ўйинни томоша қилиш учун стадионга ташриф буюрган барча ишқибозларга миннатдорчилик билдираман.