Любинко Друлович Ўзбекистон ОТЖнинг бой берилган ғалабасига қандай изоҳ берди?

Ўзбекистон олимпия терма жамоаси Осиё чемпионати биринчи турида Эрон билан 1:1 ҳисобидаги дуранг қайд этди.

Учрашувдан сўнг терма жамоамиз бош мураббийи Любинко Друлович ўйин борасида ўз фикрларини билдириб ўтди.

- Яхши ўйин бўлди. Икки яхши савиядаги жамоалар ўзаро курашди. Эрон жисмонан анча кучли жамоа. Бизда имконият бор эди ғалаба қозониш учун. Лекин афсус бугун 3 очко ололмадик. Энди кейинги ўйинларда бугунги очколар ўрнини тўлдиришга ҳаракат қиламиз.

Алижонов ва Қодирқулов клуби ва Ўзбекистон миллий терма жамоасида кўплаб ўйин ўтказишди. Шу боис улар бугун бироз чарчаб қолгандек. Бугун уларнинг ўйини қовушмади.

Ўйиннинг 15-20 дақиқасигача Эрон фаолроқ кўринди. Ундан сўнг биз ўйин тизгинини қўлга олдик. Пенальти ишладик ва гол урдик. 2-таймда эса хатоларимиз туфайли гол ўтказиб юбордик. Учрашув давомида имкониятларга эга бўлдик. Мисол учун Ойбек Бозоровда дарвозани ишғол этиш учун вазият бўлганди. Бироқ у нишонга олишда адашди. Бу футбол ва унда бундай ҳолатлар учраб туради.

2 йил аввал терма жамоа мусобақада чемпион бўлганди. Бу гал ҳам жамоа ғалаба қозона оладими?

- Албатта, бизнинг мақсадимиз ҳудди шу. Унга эришишга ҳаракат қиламиз. Энди эътиборимизни Хитойга қарши учрашувга қаратамиз. Ушбу баҳсда ғалаба қозонишимиз керак.

Гуруҳимиз? Чиндан ҳам гуруҳимиз анча мураккаб. Энди навбатдаги ўйинларга эътибор қаратишимиз шарт. Энди Хитойни мағлубиятга учратишимиз, ундан кейин Жанубий Кореяни таслим этишимиз талаб этилади. Бу жуда қийин. Бироқ бор кучимиз билан ҳаракат қиламиз.

Терма жамоада гол урадиган ҳужумчи етишмаяпти? Остон Ўрунов нега келмади?

- Кеча ҳам айтиб ўтдим, таркибимизда йўқ бўлган футболчи ҳақида гапиришим нотўғри. Ҳозир сафимизда энг яхшилар жамланган. Шу боисдан ҳам барча футболчиларни билган ҳолда таркибга жалб этдим, - деди мураббий.