Лапорта Ольмо ва Виктор борасидаги вазиятларга ойдинлик киритди

Жоан Лапорта Дани Ольмо ва Пау Виктор иши бўйича қабул қилинган қарор ҳақида ўз фикрини билдирди.

- Сўнгги икки ҳафта ичида ушбу ҳолат бўйича тасдиқланган ва инкор этилган иккита воқеа содир бўлди. Умуман олганда, буларнинг бари клубнинг кучли эканлигини билдиради. Шунингдек, улар билмасдан ёки нияти бузуқлик билан айтилган баёнотларни ҳам рад этади.

Биринчидан, биз "1 х 1" қоидасига қайтдик ва яна шартномаларни одатдаги тартибда имзоламоқдамиз. Бу бизга Дани Ольмо ва Пау Виктор каби ўйинчиларни рўйхатдан ўтказиш имконини беради. Ушбу қоидага қайтиш учун биз "Nike"га ўхшаш шартномалар тузишга мажбур бўлдик. Бу футбол оламидаги кийим бренди билан имзоланган энг яхши шартнома ҳисобланади. Шунингдек, клубнинг обрўси ёмон ва уни ёмон бошқаришмоқда, деб айтганларнинг сўзларини ҳам инкор этади, - деди "Барселона" президенти.

Эслатиб ўтамиз, аввалроқ, спорт бўйича олий кенгаш "Барселона"га ушбу футболчиларни мавсумнинг иккинчи ярми учун вақтинчалик рўйхатдан ўтказишга рухсат берган эди.