Испанлар Шомуродовни унутгани йўқ!

Европа лигасининг гуруҳ босқичи учинчи турида “Рома” ўз мухлислари кўз ўнгида Испаниянинг “Бетис” жамоасини қабул қилади.

Бўлажак баҳсда “бўрилар”ни фақат ғалаба қониқтиради. Чунки “Бетис” халқаро турнирнинг дастлабки учрашувда гуруҳнинг икки вакили – ХИКни 2:0, “Лудогорец”ни 3:2 ҳисобида мағлубиятга учратиб, пешқадамга айланиб олди.

Болгария жамоасига ютқазиб, финляндияликларни енгган “Рома” испанларни мағлубиятга учрата олмаса, гуруҳдан чиқиш имкониятлари сезиларли даражада пасайиб кетди.

Статистика мутахассисларининг таъкидлашича, “Рома” ўз майдонида Испания клублари билан жами 17 маротаба беллашган. Бу тўқнашувларнинг еттитасида “Олимпико” эгалари ғалабани тантана қилган, икки бор дуранг қайд этиб, саккизта учрашувда мағлубиятга учраган.

Эътиборли жиҳати, “бўрилар” ўз майдонида испан клублари билан бўлган охирги саккизта учрашувнинг фақат биттасида зафар қучган. Ўша машҳур беллашувда “Рома” футболчилари “Барселона” вакилларини 3:0 ҳисобида мағлуб этганди.

“Бетис” жамоаси Италияга уч марта сафар уюштирган ва А Серияга клубларига қарши ўйинларда битта ғалаба ва иккита мағлубият қайд этган. Ягона ғалаба 2018 йилнинг октябрида Европа лигаси гуруҳ баҳсида “Милан” устидан қозонилган – 2:1.

“Рома”ни бошқараётган Жозе Моуриньо ва “Бетис” бош мураббийи чилилик Мануэль Пеллегринининг ўзаро тўқнашувлари тарихи анчагина бой. Португалиялик мутахассис ўзаро баҳсларда ҳамкасбини саккиз марта “тиз чўктирган”. Учта беллашувда ғолиб аниқланмаган. Тўрт маротаба Пеллегринининг қўли баланд келган.

Яна бир эътиборга молик томони Моуриньо 2010 йили “Реал”га айнан Мануэль Пелегрини ўрнига қабул қилинган.

“Рома” Еврокубокларда мағлубиятсиз серияни давом эттирмоқда. “Бўрилар” қитъа миқёсидаги халқаро турнирларда йигирмата учрашувдан бери ўз майдонида мағлуб бўлмай келмоқда. Улар шу баҳслардан 14 тасида зафар қучган.

Европа лигаси доирасидаги учрашувлар “Рома” футболчилари  “Олимпико”даги мағлубиятсиз серияси 13 тани ташқил қилмоқда. Римликлар ҳисобида бу турнирда тўққизта ғалаба ва тўртта дуранг бор.

“Бетис” вакиллари эса Европа лигасидаги сафар учрашувларида кетма-кет учта баҳсда мағлубиятга учрагани йўқ.

Ҳар икки жамоа бой тарихга эга эканига қарамай, улар расмий учрашувларда ўзаро тўқнаш келмаган.

2021 йили “Бетис” ва “Рома” ўртоқлик ўйинида куч синашган холос. Севилья шаҳридаги “Бенито Вильямарин” аренаси мезбонлик қилган  ўша баҳс “Рома”даги вакилимиз Элдор Шомуродов учун тарихий аҳамият касб этади.

Шомуродов ўртоқлик баҳсида “Рома” сафидаги дебют голини урган ва жамоадоши Жанлука Манчинига голли пас узатиб берган.

Ўртоқлик ўйини севильяликларнинг 5:2 ҳисобидаги ғалабаси билан якунланганига қарамай, Шомуродов жамоасининг ҳар икки голида иштирок этиб, янги ўйинчи сифатида ўз салоҳиятини намойиш эта олган эди.

“Рома” ва “Бетис” ўртасидаги илк расмий учрашув бугун Тошкент вақти билан ярим тунда, соат 00:00 да бошланади.

Шомуродов, тайёрлан!

Экспертлар баҳоси: Шомуродов қаҳрамон бўлиши мумкин эди...

Ўрунов "модный" йигит!