Икки легионеримиздан бири Европада илк совринга эга бўлади!
- 1-март 2021, 06:45
- Zohir Toshxo’jayev
- 0
- Футбол
Беларусь футболи ўзбек футболчилари учун омад келтирадиган лигага айланиб қолди. Ўтган мавсумда “Шахтёр” билан бирга чемпионликни тантана қилган Жасур Яхшибоев Беларусь футболида ўзига хос из қолдирганидан кейин, янада кучлироқ лига – Польша чемпионатининг етакчи жамоасига кўчиб ўтди.
Янги мавсумда Беларуснинг икки қудратли клуби – “Шатхёр” ва БАТЭда асосий ролларни легионерларимиз – Шаҳзодбек Убайдуллаев ва Шаҳбоз Умаров ўйнаши кутилмоқда. Жасур Яхшибоев ўрнига солигорскликлар жамоасига таклиф этилган Шаҳзод Убайдуллаев мавсумолди ўқув-машғулот йиғинларида гол уриш ҳадисини олганини намойиш қилиб, ўртоқлик учрашувларида тўртта тўп киритди.
БАТЭ етакчисига айланиши кутилаётган Шаҳбоз Умаров эса Беларусь футболининг паст-баландини яхши билади. Бу легионеримиз учун бошланаётган мавсум аввалгисидан ҳар томонлама яхши бўлиши керак.
Икки футболчимиздан бири янги мавсумни янги соврин билан бошлаши кутилмоқда. Чунки олий лига ўйинларидан аввал, ўтган мавсум қаҳрамонлари – чемпион ва кубок соҳиби Беларусь Суперкубоги учун ўзаро беллашади. Маълумки, ўтган мавсумнинг сўнгги учрашуви, охирги дақиқаларида “Шахтёр” чемпионликни БАТЭдан тортиб олган бўлса, борисовликлар мамлакат кубогини қўлга киритган эди.
Ҳар икки жамоа мавсумнинг илк соврини олиш учун жиддий тайёргарлик кўрди. Ҳал қилувчи тўқнашув ҳам шунга яраша кескин ва муросасиз руҳда ўтади.
БАТЭ 2010 йилдан бери ўтказиб келинаётган Беларусь Суперкубоги рекордчиси ҳисобланади. Борисовликлар 2020 йилгача узлуксиз ўн марта суперкубокнинг ҳал қилувчи баҳсида иштирок этган ва етти марта совринни ўзиники қилган. “Динамо-Брест” икки бор, “Гомель” бир марта суперкубокни БАТЭдан тортиб олган.
Тарихи давомида иккинчи марта Беларусь чемпиони бўлган “Шахтёр” Суперкубок учун уч бор майдонга тушиб, ҳал қилувчи баҳсларнинг барчасини бой берган. Солигорскликларни икки марта БАТЭ ва ўтган йили “Динамо-Брест” армонда қолдирган эди. “Динамо-Брест” кетма-кет уч марта Суперкубокни ютди. Лекин бу гал кубок эгаси ўзгаради.
Беларусь футбол федерацияси 2021 йилги мамлакат Суперкубоги учун баҳс 2 март куни “Минск” футбол клуби стадионида бўлиб ўтишини белгилади.
Учрашувни Амин Кургхели бошчилигидаги ҳакамлар бригадаси бошқаради.
Беларусь Суперкубоги баҳси олдидан мутахассисларнинг аксарияти БАТЭнинг имкониятини юқори баҳоламоқда. Чунки борисовликларнинг солигорскликлар билан ўтган йили чала қолган ҳисоб-китоби бор. БАТЭ охирги учрашувда чемпионликни қўлдан чиқаргани ва Жасур Яхшибоев жамоаси тарихий олтин медалга эга бўлганини яхши эслаймиз.
“Шахтёр” Суперкубокларда қора анъанага эга. Солигорскликлар ҳач қачон бу совринни ола билмаган. Таркиб борасида ҳам устунлик борисовликлар томонида.
Шунга қарамай, Беларуснинг энг нуфузли нашри – “Прессбол” сайтидаги сўровда иштирок этаётган мухлисларнинг 51,6 фоизи бу галги баҳсда “Шахтёр”нинг қўли баланд келишини тахмин қилмоқда.
Нима бўлган тақдирда ҳам, биз ушбу учрашувда футболчилардан чиройли ўйин кутиб қоламиз. Биз учун муҳими эса, ҳар икки жамоада ўзбекистонлик легионерларнинг етакчи ролларда бўлишидир. Шаҳзод ғолиб чиқадими ёки Шаҳбоз, буни унчалик аҳамияти йўқ. Қайси жамоа муносиб бўлса, Суперкубокни ўша олсин!