Ҳусановнинг ўзига ва мухлисларига хушхабар

Ўзбекистон миллий терма жамоаси ва “Манчестер Сити” клубининг маҳоратли ҳимоячиси Абдуқодир Ҳусанов ва унинг бутун дунё бўйлаб ёйилган мухлислари яна бир хушхабар олди.

Халқаро футбол тарихи ва статистика федерацияси – IFFHS экспертлари 2025 йил якунлари бўйича Осиё қитъасининг энг зўр футболчиларидан иборат йилнинг рамзий терма жамоасини тузиб чиқди.

21 ёшли Ҳусанов ҳам Осиёнинг энг кучли чарм тўр усталари қаторидан жой олди. Умумий ҳисобда рамзий терма жамоага қитъанинг тўртта мамлакатидан футболчилар киритилди.

Энг кўп вакил – беш нафар ўйинчи Япония терма жамоасидан танланган. Жанубий Кореядан уч нафар ва Саудия Арабистонидан икки футболчи киритилди. Ҳусанов эса, рамзий жамоадаги ягона ўзбек футболчиси бўлди.  

Халқаро ташкилот экспертлари тузган жамоа қуйидагича кўриниш олди.

Дарвозабон:

Дзион Сузуки (Япония).

Ҳимоячилар:

Абдуқодир Ҳусанов (Ўзбекистон), Рео Хатате (Япония), Мин Даэ Ким (Жанубий Корея).

Ярим ҳимоячилар:

Канг Ин Ли (Жанубий Корея), Муҳаммад Канно (Саудия Арабистони), Каишу Сано ва Ритсу Доан (Япония).

Ҳужумчилар:

Салим Ад-Давсарий (Саудия Арабистони), Хён Мин Сон (Жанубий Корея), Такефуса Кубо (Япония).

2025 йил Абдуқодир Ҳусанов фаолиятидаги энг ёрқин босқичлардан бири бўлди. Шу йилнинг 20 январида у Франциянинг “Ланс” клубидан “Манчестер Сити”га трансфер қилинди.

Ҳусанов “топ-5” лигаларининг иккитасида ўйнаган, Англия чемпионатида иштирок этган ягона ўзбек футболчисига айланди. Бундан ташқари, 21 ёшли ҳимоячи Ўзбекистон миллий терма жамоаси сафида 2026 йилнинг ёзида бўладиган жаҳон чемпионатида иштирок этиш ҳуқуқини қўлга киритди.

Гвардиола Ҳусановнинг “Сити”даги бир йиллик фаолиятига баҳо берди

Гвардиола умиди: Ҳусанов қандай қилиб “Манчестер Сити” етакчисига айланди?

Ҳусанов Англияда “топ-5”га кирди!