Ҳусанов энг “ишкал” футболчини ҳам ҳайратга солди!
- 4-апрел 2025, 18:35
- Zohir Toshxo’jayev
- 0
- Футбол
Айни пайтда “Акрон” жамоасида ўзбекистонлик легионер Шерзод Эсонов билан бирга ўйнаётган россиялик машҳур ҳужумчи Артём Дзюбанинг Россия футболида ўз ўрни бор.
36 ёшли футболчи яқинда профессионал фаолиятидаги голлари сонини 234 тага етказиб, Россия футболида энг кўп гол урган чарм тўп устасига айланди. Ўз юртида “Спартак”, “Томь”, “Ростов”, “Арсенал”, “Зенит”, “Локомотив” каби клубларда ўйнаган, Туркия чемпионатида “Адана Демирспор” шарафини ҳимоя қилган тажрибали ҳужумчи оғир характерга эга.
Артём Дзюба футбол жамоатчилигида ва ундан ташқарида бир неча таниқли инсонлар билан можаро ва зиддиятларга боргани билан тилга тушган. Айнан мана шу “ишкаллиги” унинг янада ёрқин порлашига тўсқинлик қилган, дейиш мумкин.
Яқинда россиялик юлдуз Ўзбекистон миллий терма жамоаси ва “Манчестер Сити” клуби марказий ҳимоячиси Абдуқодир Ҳусанов ҳақида фикр билдириб, ўзбек футболчисининг ўйинларини Англияга боришидан олдин кўрганини маълум қилди.
- Ҳусанов – топ-футболчи. Менга унинг ўйинини “Акрон”даги жамоадошим Шерзод Эсонов кўрсатган эди. У Абдуқодирни анчадан бери танийди. Ёш иқтидор эгаси Шерзод “Бизда бир йигит бор, “Ланс”да ўйнайди”, деб Ҳусановнинг ўйинидан видеолавҳаларни менга кўрсатди.
Мен Ҳусановнинг ўйинини кўриб ҳайратга тушдим. Бўйи жуда баланд эмас, лекин юқорида шундай курашяптики, гўё учяпти.
Кейин яна бир ҳолатни кўрдим: Винисиус Жуниор унинг ёнидан тўпни ўтказди, лекин ўзи тезликда Ҳусановдан ўзиб кета олмади...
Беларуснинг қандайдир жамоасида ўйнаб юрган футболчининг “Манчестер Сити”да пайдо бўлиши миллиондан бир бўладиган воқеа, - деди Артём Дзюба.
Футбол сир-асрорларини “Бунёдкор” академияси ўрганиб, ҳали ўсмирлик давридаёқ Беларусга йўл олган, профессионал фаолиятини “Энергетик-БГУ” жамоасида бошлаган Абдуқодир Ҳусановнинг ҳаёт йўли ҳақиқатан ноёб.
Биринчи профессионал шартномасини 2022 йили тузган ёш ҳимоячи бир йилдан кейин Франциянинг ўша пайтдаги вице-чемпиони “Ланс”га йўл олди. Ҳусановнинг Европанинг бир қатор клублари эътиборига тушишига 2023 йили Аргентина ташкил этилган 20 ёшгача футболчилар иштирокидаги жаҳон чемпионати сабаб бўлди. Ўша турнирда Ўзбекистон ёшлар терма жамоаси сафида тўртта учрашувда майдонга тушган Абдуқодир юқори салоҳиятини намойиш қила олганини кейинчалик бир неча мутахассислар, скаутлар ва мураббийлар алоҳида таъкидлади.
Франция чемпионатидаги бир ярим мавсумлик фаолияти давомида иқтидорли легионеримиз Европанинг “топ-5” лигаларидан йигирмага яқин клуб эътиборини тортди. Қишки трансферлар вақтида “Манчестер Сити” умумий ҳисобда 50 миллион евро эвазига Ҳусановни ўз сафига қўшиб олди.
21 ёшли Ҳусанов қисқа фуратда Хосеп Гвардиола жамоасининг асосий фигураларидан бирига айланди ва февраль ойида “Манчестер Сити”нинг энг яхши ўйинчиси, деб топилди.
Шу ўринда, sports.uz портали Артём Дзюбага Абдуқодирнинг ўйинларини кўрсатган Шерзод Эсонов ҳақида ҳам маълумот беришни маъқул топди.
22 ёшли марказий ярим ҳимоячи Эсонов “Қизилқум” ва “Чиғатой” жамоалари тарбияланувчиси ҳисобланади. Профессионал фаолиятида Ўзбекистон Суперлигасида “Андижон” ва “ Олимпик” клубларида тўп тепган.
Шерзод 2024 йилнинг ёзида 210 минг евро эвазига “Андижон”дан Тольяттининг “Акрон” жамоасига трансфер қилинди. Шундан бери иқтидорли футболчимиз Россия Премьер-лигаси ва мамлакат кубоги доирасида еттита учрашувда иштирок этиб, битта гол уришга муваффақ бўлди.