Ҳамиджон Актамов: “Пахтакор” бизга имкон бермади

Суперлига 15-турида “Қизилқум” ўз майдонида “Пахтакор”ни қабул қилиб, йирик ҳисобда имкониятни бой берди - 0:5. Учрашувдан сўнг мезбонлар устози Ҳамиджон Актамов қуйидаги фикрларни билдирди. Бу ҳақда клуб матбуот хизмати хабар берди.

- «Пахтакор» Ўзбекистоннинг байроқдор жамоаси ва айни пайтда чемпионат пешқадами ҳисобланади. Рақиб таркиб жиҳатдан шубҳасиз энг кучли жамоа ҳисобланади. Шунга қарамай биз ҳам учрашувга жиддий ҳозирлик кўргандик. Бироқ тажрибали рақибимиз ўзи яратган имкониятларни голга айлантирди, бизга эса имкон бермади. Статистикага қарасак биз ҳам зарба беришда рақибдан ортда қолишмасликка уриндик. Аммо Суюнов энг керакли паллада жамоасини муқаррар голлардан сақлаб қолди. Иккинчи давра энди бошланди. Кейинги ўйинларда мухлислар ишончини қозонишга уринамиз, - деди Ҳамиджон Актамов.