Ҳаким Фузайлов: "Бу 6 очколик ўйин эди, жамоамиз ғалабаларга ташна"

Про-лига 8-тури доирасидаги “Динамо” – “Бухоро” (3:1) учрашувидан кейин мезбонлар бош мураббийи Ҳаким Фузайлов матбуот анжуманида ўйин борасидаги фикрлари билан ўртоқлашди.

- Ҳаким Қаюмович, авваламбор муҳим ғалаба билан табриклаймиз. Ўйин борасида фикрларингиз...

- Аввал ҳам айтиб келганман, про-лигадаги деярли барча жамоаларнинг кучи тенг ва ҳар бир баҳс жуда оғир ўтади. Бугунги рақибимиз - “Бухоро” олдида ҳам Суперлига вазифаси турибди, бу жамоа бежизга юқори ўринларда эмас.

Мени хурсанд қилган жиҳати жамоамиз таркиб жиҳатдан ва умуман айрим муаммоларга қарамай, бу ўйинга кучли иштиёқ билан тушди ва майдоннинг ҳар бир қаричи учун курашди. Ҳа, ўйин давомида хатоларимиз кўп бўлди, ҳали яна учраб туради ҳам, чунки жамоа таркиби янги. Бугунги ўйинимиз ва футболчиларим ҳаракатидан қониқдим. Йигитлар ўйинида ўсиш кузатилаётгани қувонарли. Муҳими ўсишдан тўхтамаслик.

- “Динамо” Самарқанддаги ва сафардаги ўйинларида бошқа-бошқа жамоадек тасаввур уйғотмоқда. Яъни, ўз майдонида яхши ўйин намойиш этмоқда, сафарда эса жамоани унчалик таниб бўлмаётгандек. Сизнингчи, бу нима билан боғлиқ?

- Сабаблар кўп. Айтайлик, Урганч ва Тошкентдаги ўтган ўйинлардаги минимал мағлубиятларимизда ҳам жамоа “Хоразм” ва “Оқ-тепа”дан кучлироқ кўринди, ўйинда устунлик қилганди, аммо рақиблар яримта вазиятни голга айлантиришган эди, биз эса имкониятлардан фойдалана олмагандик.

- Рақибдан нималарни кутган эдингиз ва ҳозирги таассуротларингиз қандай?

- Бу беллашувгача ҳам “Бухоро” билан ўйин кескин, асабий ҳамда шиддатли ўтишини тахмин қилгандим ва шундай ҳам бўлди. Биз ҳам, “Бухоро” ҳам Суперлига учун курашмоқда. Бу жамоанинг таркибида кучли ўйинчилар йиғилган. Шу боис бу 6 очколик ўйин эди. Ушбу баҳсдаги ғалаба орқали етакчилар гуруҳига етиб олдик.

- “Динамо” жорий мавсумда илк марта про-лига пешқадамларидан бирини мағлуб этди. Бу жамоа йигитларига қай даража таъсир қилиши мумкин?

- Жамоадаги барча футболчиларнинг жанговор руҳи ошишига сабаб бўлади. Ютиб туриб ҳам ўйин давомида бир-биримизга эътирозларимизни айтишимиз бу яхши, чунки жамоамиз ғалабаларга ташна, барчамиз бир оилага айланганмиз. Навбатдаги турда 3 июнь куни “Олимпик” билан ўтадиган баҳсга қадар яхши тайёргарлик кўришимиз лозим.

- Яхши ўйин намойиш этаётган Жасур Ҳасанов ва Олег Марчукнинг алмаштирилиши нима билан боғлиқ?

- Марчукда чарчоқ аломатлари сезилганди, қолаверса оёғидан кичик жароҳати бор эди. Унинг ўзи алмаштиришимизни сўради. Жасур Ҳасанов эса жароҳатидан кейин секин-аста ўйин суръатига мослашмоқда. У тажрибали ўйинчи, ҳали бизга кўп ёрдам беради.

“Динамо” клуби матбуот хизмати.