Италиядан Шомуродов борасида ЎФАга мурожаат, Элдорнинг агенти жавоб бермагани, клубларимиздаги европалик мураббийлар - Ҳафта воқеликлари

Ассалому алайкум SPORTS.uz сайтининг кузатувчилари. Бугун биз сизларга “ҳафта воқеликлари” кўрсатувининг навбатдаги сонини тақдим этамиз. Сиз унда ўзбек ва хориж футболида рўй берган энг муҳим воқеликлар билан танишасиз. Сиз тайёр бўлсангиз, биз бошладик.

Биз бу галги кўрсатувимизнинг катта қисмини Элдор Шомуродовга бағишлаймиз. Чунки унинг атрофидаги гап-сўзлар кўпчиликнинг диққат марказида. Шу боис биз сизларга энг саралари ва воқеалар ривожи қай йўсинда бошланганию, ҳозир қайси йўналишда давом этаётганини маълум қиламиз.

Ҳа айтганча, клубларимизда ҳам янгиликлар йўқ эмас. Жамоаларимизга Европадан мураббийлар келган. Яна қаердан денг? Испания ва Португалиядан.

1.“Пахтакор” клубига бош мураббий тайинланди. Арвеладзенинг қайтишидан охиригача умидини узмаган “шерлар” ниҳоят янги бош мураббийни эълон қилишди

2.“Локомотив”га португалиялик, “Машъал”га испаниялик мутахассислар бош мураббий этиб тайинланди. “Темирйўлчилар”ни кўпни кўрган мураббий қўлга олди. Муборакликларни эса “Оқ тепа”дан келган мутахассис бошқаради.

3.Шомуродовга “Ювентус” қизиқмоқда экан. Ҳамюртимиз туринликларнинг асосий трансферига айланиши мумкин. У Альваро Моратанинг ўрнини эгаллаши кутилмоқда.

4.Элдор туринликларнинг нишонида эканлиги борасидаги хабар қанчалик ҳақиқат? Ушбу маълумотни тарқатган “Tuttosport” нашри Роналдунинг Туринга кўчиб ўтишини биринчи бўлиб эълон қилганди.

5.Ҳужумчимиз ҳақида мутахассислар нима дейди? Унинг агентичи? Италиянинг яна бир нашри Шомуродов бўйича ЎФАга мурожаат қилди

1.Шота Арвеладзе шартномаси якунланганидан сўнг, "Пахтакор"ни тарк этганди. Грузиялик мутахассис клубдан кетганини ва барчага раҳмат айтиб, хайрлашув мактубини ҳам ёзди. Аммо тошкентликлар матбуот хизмати унинг жамоани тарк этгани борасида шу кунгача ҳеч нарса демади. Бу орада эса, "шерлар" Арвеладзени ортга қайтаришга ҳаракат қилаётгани борасида миш-мишлар ёки аслида ҳақиқат бўлган маълумотлар тарқалди. Шу боисми ёки бошқа сабаб, Арвеладзенинг кетгани эълон қилинмади.

Бир неча кун аввал, SPORTS.uz сайтида агарда "Пахтакор" Шота Арвеладзе билан келиша олмаса, унинг ёрдамчиси Питер Хюистра жамоага устозлик қилиши мумкинлиги ёзилди. Нидерландиялик мутахассис ушбу лавозимга асосий даъвогар сифатида қаралаётганди. Шунингдек, номзодлар орасида Самвел Бабаян, Миржалол Қосимов ва жуда кичик эҳтимол билан Рўзиқул Бердиевнинг "шерлар" устозига айланиши тахминлари йўқ эмас.

15 январга келиб, ниҳоят клуб матбуот хизмати кўпчилик кутган ва тахмин қилган маълумотни чоп этди. Питер Хюистра "Пахтакор" бош мураббийи этиб тайинланди.

Шу кунгача жамоада ёрдамчи мураббий сифатида ишлаб келган Питер Хюистра "Пахтакор" бош мураббийига айланди. У Шота Арвеладзе билан мураббийлар штабида бирга фаолият юритиб келаётганди. Охирги йилларда шакллантирилган ҳужумкор, чиройли ва мухлисларга маъқул келадиган футбол фалсафасига асосланган ўйин услубини янада яхшилаб боришга уриниш шу тариқа давом эттирилади, дейилади расмий хабарда.

2017 йил июнь ойидан бошлаб, "Пахтакор"да ёрдамчи мураббий сифатида ишлаб келди ва жамоа ғалабаларига ўз ҳиссасини қўшди. Эндиликда Питер бош мураббий лавозимида фаолиятини давом эттиради.

 

2.Тошкентнинг "Локомотив" клубини энди португалиялик мураббий Микаэль Секейра бошқаради. Клуб матбуот хизмати шу пайтгача Португалиянинг "Брага" клубида ёрдамчи мураббий сифатида ишлаб келган Микаэль Секейра "темирйўлчилар" билан 2 йиллик битимга имзо чекканини маълум қилди. 2011 йил УЕФA Про лицензиясини қўлга киритган мутахассис ушбу мавсумдан "Локомотив" ПФК бош мураббийи сифатида фаолият олиб боради.

47 ёшли мураббий 2006-2008 йилги мавсумларда "Брага" клубини бош мураббий сифатида бошқарган. 2010/2011 йилги мавсумда айнан шу жамоада бош менежер бўлиб фаолият юритган.

Микаэль Секейра учун Осиё бегона эмас. Чунки португалиялик мутахассис 2018-2019 йилги мавсумда Саудия Aрабистонининг "Aл-Насср" клубида U-21 жамоаси бош мураббийи бўлиш билан бирга асосий таркибда Руи Виториага ёрдамчи мураббий сифатида иш олиб борган.

Мураббий эришган ютуқлар ҳақида шуни айтиш мумкин, Микаэль Секейра "Брага" бош менежери бўлиб ишлаган йил жамоа Европа лигаси финалида ўйнаган. Осиёдаги фаолиятида эса "Aл-Насср" билан Саудия Aрабистони чемпионлигини қўлга киритган, қолаверса, U-21 жамоаси билан ҳам мамлакат биринчилигида зафар қучган.

Испаниялик Серхио Маринангели "Машъал" бош мураббийи этиб тайинланди. Айтиш керакки, Серхио бунга қадар Про лигада “Оқ-тепа” жамоасида ишлаб келаётганди.

Испаниялик мутахассис 2015-2017 йилларда Экваториал Гвинея терма жамоасида бош мураббий Эстебан Беккерга ассистентлик қилган ҳамда 2015 йилги Африка Миллатлар кубогида ярим финал босқичигача олиб бориб қитъанинг кучли тўрт жамоаси қаторидан жой олишида катта ҳисса қўшган.

Серхио фаолияти давомида мураббий сифатида 2014-2015 йилларда Испания чемпионатининг биринчи лигаси вакили "Эскуела Футбол Алуче" жамоасида бош мураббий, 2016-2017 йилларда Мадрид ёшлар жамоаси бўлмиш "Юнион Депортива Трес Сантос" клубида, 2017 йилдан бугунги кунгача эса, Мадрид лигасининг "Иглесиас Ла Вид" клубида фаолият юритган. 2019 йилда УЕФА Про лицензиясини қўлга киритган. "Реал Мадрид", "Атлетико" клубларида малака оширган, шунингдек, АПЛ иштирокчиси "Лидс" клуби бош мураббийи Марсело Бьелса қўл остида амалиёт ўтаган.

 

3.Ўтган ҳафтада Элдор Шомуродов "Ювентус"га ўтиши мумкинлиги борасида хабарлар тарқалди. Бу ўзбек, рус ва итальян жамоатчилигини ҳайратга солди. Чунки Турин суперклубидек катта жамоанинг эътибори Элдор Шомуродовга қаратилганди.

Италиянинг машҳур нашрларидан бири "Tuttosport" ҳамюртимиз "Ювентус"га ўтиши учун асосий номзод эканлигини ёзди. У Туринда тез-тез жароҳат олаётган Альваро Моратанинг ўрнига номзод сифатида кўрилаётган бўлиши мумкин. “Ювентус” Альваро Моратага захира вариант қидирмоқда. Шомуродов эса, "кекса синьоралар" шорт-листидан ўрин олган.

Шунингдек, нашрда ёзилишича, Ўзбекистон миллий терма жамоаси ҳужумчиси қишки трансферлар пайтидаёқ, Генуяни Туринга ўзгартириши мумкин. Чунки "Юве" Моратани "Атлетико"дан ижарага олгани боис барқарорлик етишмаётган испанияликдан воз кечиши мумкин. Бу орада унинг ўрнини улар Шомуродов билан тўлдириши кутилмоқда.

4.Шомуродовга “Ювентус” томонидан бўлган қизиқиш борасидаги хабарларни ҳамма ҳар хил қабул қилмоқда. Кимдир ишонмоқда, кимдир эса йўқ. Аввал “Туттоспорт” ёзган бўлса, кейин Gazzetta Dello Sport ҳужумчимиз ҳақида маълумотлар чоп этди. Демак, нимадир бор. Айтишадику, “шамол бўлмаса дарахтнинг учи қимирламайди”.

Ҳамюртимизнинг охирги пайтлардаги ўйинлари сабаб, унга гранд клублар, хусусан, “Ювентус” қизиқа бошлагани ҳақида хабарлар ҳозиргача тингани йўқ. Бунинг таъсирида Турин суперклуби ҳам вазиятга ойдинлик киритишга қарор қилди. Бу масъулиятни “Ювентус” спорт директори Фабио Паратичи ўз зиммасига олди.

- Элдор Шомуродов ва Скамакка масаласига аниқлик киритиш учун шуни айтишим керакки, айни пайтда жамоамиз рақобатбардош ҳисобланади. Агар биз трансфер бозорида биз учун ижобий имкониятлар юзага келганини кўрсак, ўшанда бир қарорга келамиз. Ҳозирча, бу борада шошилишга ҳожат йўқ, - деди Фабио Паратичи.

5.Россиянинг "Ростов" клуби бош мураббийи Валерий Карпин собиқ шогирди "Женоа" ҳужумчиси Элдор Шомуродовга "Ювентус"нинг қизиқиши борасидаги хабарларга муносабатини билдирди.

- Агар бу ҳақиқатдан ҳам шундай бўлса, нега ўтмаслиги керак? Бўридан қўрққан – ўрмонда юрмайди, - деди Карпин.

 Шомуродовнинг трансфери билан шуғулланадиган "ProSports Management" компанияси вакили Каҳҳор Мўминов ушбу маълумотлар юзасидан изоҳ беришни истамади. Бу ҳақда Sport24 нашри хабар берди.

Компания вакили ҳужумчимизга қизиқиш борлигини ҳам инкор этмаган, йўқлигини ҳам. Демак, бу ерда бир гап бор. Яъни қизиқиш бордир, аммо расмий таклиф йўқдир. Шунинг учун Мўминов расмий бўлмаган маълумотларга муносабат билдиришни истамагандир.

Шомуродовнинг ўйинлари футболимизни танитаётгани ҳақида шарҳловчи Даврон Файзиев телеграмдаги саҳифасида фикрларини баён этди. “Женоа" ўзининг янги Элдор..адосини топди”, дейилган сарлавҳада.

Шунингдек, Шомуродовнинг Италиядаги ҳаёти, Ўзбекистонда унинг фаолиятига муносабат, натижалари, инстаграм саҳифаси ва яна бир қанча маълумотлар ёзилган. Буларни таржима қилмасак ҳам сизга маълум, италияликлар эса, Шомуродов билан энди танишмоқда. Элдорнинг дебюти "Женоа"да умид уйғотмоқда. Унинг ёрдамида Генуя клуби А Серияда курашни давом эттирмоқчи.

Дарвоқе, Gazzetta вакиллари бизга ҳам (ЎФА Медиасига) мурожаат қилиб, Вадим Абрамовнинг фикрлари билан қизиқишди. Ташкил этиб бердик. Ҳозирда Италия футбол оммаси Ўзбекистон футболи билан яқиндан танишмоқда. Мана қанчалик муҳим кучли чемпионатларда вакилларимизнинг ўйнаши. Кўпаяверишсин, - дея ёзиб қолдирди Даврон Файзиев.