Флорентино Перес: "Дунёнинг энг яхши чап қанот ҳимоячиларидан бири уйига қайтди"
- 15-июл 2025, 18:29
- Bilolbek Imomov
- 0
- Футбол
Мадриднинг "Реал" клуби президенти Флорентино Перес 22 ёшли ҳимоячи Альваро Фернандес Каррераснинг жамоага қайтиши муносабати билан чиқиш қилди. Эслатиб ўтамиз, футболчи кеча "Бенфика"дан 50 миллион еврога сотиб олинди.
"Бугун "Реал" мухлислари учун яна бир муҳим кун. Чунки тарбияланувчимиз клубга қайтмоқда. Бу каби лаҳзалар биз учун катта илҳом манбаидир. Бугунги кунда биз тарихимизнинг энг муваффақиятли даврларидан бирини бошдан кечирмоқдамиз ва янги ютуқлар учун ишлашда давом этамиз.
Жорий мавсум олдидан Трент, Хаусен ва Мастантуоно каби футболчилар, шунингдек, дунёдаги энг яхши мураббийлардан бири — Хаби Алонсо билан шартнома имзоладик. Бугун эса сизларга яна бир ажойиб футболчини тақдим этяпмиз — Альваро Каррерасни.
Сен бу шаҳарга болалигингда келгансан ва дунёдаги энг буюк клубнинг бир қисми бўлиш нима эканини ўргангансан. Асосий жамоада ўйнаш сенинг орзуинг эди. Шунинг учун, ривожланиш учун жамоани тарк этдинг ва эндиликда етук футболчи сифатида қайтдинг.
"Бенфика"да сен ўз севгингни қозониб, лиганинг энг яхши чап қанот ҳимоячиси деб тан олиндинг. Бугун сен билан бирга сенга ишонган ва доим қўллаб-қувватлаган оиланг ҳам бор.
Қадрли "Реал" мухлислари! Бугун тарбияланувчимиз, Европанинг энг яхши ҳимоячиларидан бири клубимизга қайтди. "Сантьяго Бернабеу" сени кутмоқда. Бугунги кун сен учун ёрқин эмоциялар даврининг бошланишидир. Хуш келибсан, Каррерас. Хуш келибсан, "Реал Мадрид"га! — дея таърифлаб таништирди Флорентино Перес.