Февзи Давлетов: "Мухлислар ҳар қандай ҳолатда ҳам жамоага ишонишлари керак"

Суперлиганинг 4-туридан ўрин олган “Сурхон” – “Қўқон-1912” жамоалари ўртасидаги учрашувдан сўнг мезбонлар устози Февзи Давлетов матбуот анжуманида иштирок этди.

- Авваламбор, футбол ишқибозлари жанговар футболни кўришга муваффақ бўлишди. Ушбу учрашувда биз албатта ғалабага яқинроқ бўлдик. Биринчи бўлимда ўйинни яхши ўтказдик. Бундан ташқари, ўйин учун берилган режа ва тактик кўрсатмалар бажарилди. Лекин иккинчи бўлимда гол ўтказиб юборганимиздан сўнг бу биз учун хавотирли бўлди. Стандарт вазиятда хато қилдик. Шунга қарамасдан ҳужумга ўтдик, рақибни позициялар бўйича ўргандик ва биз яна иккита гол уришга муваффақ бўлдик.

- Босим бор эди, қийин ғалаба. Чунки мағлубиятлардан сўнг ҳамма ғалабани кутганди. Жамоа 1:0 ҳисобида олдинда бораётганда тактик ўзгаришларга қўл урдингиз. 1:1 бўлаётганда ҳимоячини ўзгартирдингиз.

-  Нодир Неъматхоновда кичик жароҳат бор эди. Натижада бу футболчини алмаштиришга мажбур бўлдик. Қанотлар бўйича эса ўзгартирдик, кучайтирдик ва тезлик қўша олдик. Бу бизни олдиндан ўйлаб қўйган режамиз эди. Ўйлайманки, бу ўзгаришлар бизга ёрдам берди ва голлар ура олдик.

- Мураббийлик фаолиятингиз давомида бу йил мухлислар томонидан сизга эътирозлар бор эди. Бу ғалабадан сўнг ишқибозларга нима деган бўлардингиз?

- Мухлислар ҳар қандай ҳолатда ҳам, ҳатто оғир вазиятларда ҳам жамоага ишонишлари керак. Жамоага келсак, бизда бўлган хатолар устида ишлаяпмиз ва уларни тузатишга ҳаракат қиляпмиз.

- Нега бугун Жаҳонгир Абдусаломов майдонда бўлмади?

- Абдусаломов касал бўлди. Ўтган ўйинда “Бунёдкор”га қарши баҳсда ҳам ўзини унчалик яхши ҳис қилмаган эди. Ўша пайтда уни майдонга туширмаслик керак, деб ҳисоблайман. Лекин у ўзи ўйнашга тайёрлигини билдирганди ва майдонга чиқди. Шунингдек, Дмитрий Плетнёвда ҳам жароҳат бор, аммо биз кейинги ўйинга қадар у тайёр бўлади, деб ўйлаймиз.