Файзуллаев Европадан кучли лигани танлади!
- 1-июн 2024, 23:59
- Zohir Toshxo’jayev
- 2
- Футбол
Ўзига ишонган ҳар бир футболчининг орзуси Европанинг “топ-5” лигаларида тўп тепишдан иборат. Ўзбекистонлик чарм тўп усталаридан ҳозирча икки нафари кучли бешлик чемпионатларида ўйнаяпти.
Элдор Шомуродов Италия А Сериясида бешинчи мавсумига тайёргарлик кўраётган бўлса, Абдуқодир Ҳусанов Франция олий дивизионида дебют мавсумини анча яхши савияда ўтказди.
Европанинг топ-клубларида ўйнаш салоҳиятига эга футболчиларимиз орасида Аббосбек Файзуллаев тилга олинмоқда. Мавсум давомида 20 ёшли футболчимизни “Бавария” ва “Парма” каби машҳур клублар кузатаётгани ҳақида хабарлар тарқатилганди.
Аббосбек Файзуллаевнинг ўзи журналистлар билан суҳбатда қайси лигани маъқул кўришини айтди.
Sports.uz портали Аббосбек Файзуллаев интерьюсини ўзбекистонлик футбол мухлислари эътиборига ҳавола этади.
— Чилилик Виктор Давила билан ўзаро дўстлигингиз қандай пайдо бўлди? Машғулотлардан ташқари ҳам бирга вақт ўтказишларинг мумкинми?
— ЦСКА жамоасида дастлабки йилимиз бўлгани учун бир биримиз билан яхши чиқишиб кетдик. Мен испан тилини ўрганишни истайман, у эса инглиў тилини. Шунинг учун бир биримизга ёрдам беряпмиз.
— Нима деб ўйлайсан, Чемпионлар лигасининг фаворити қайси жамоа?
— Мен “Боруссия” соврин ютишини истайман, лекин “Реал” ғалаба қозонадигандек. Шунчаки янги жамоа ғолиб бўлишини хоҳлаяпман.
— Европа чемпионатларида кучингни синаб кўриш ниятинг борми?
— Албатта, Европанинг топ-клубларида ўйнаш орзуси бор, фақат вақти келганда. Ҳозир ЦСКА билан шартномам бор. Мен келишув ва клубни ҳурмат қиламан.
— Сенга қайси европа чемпионати маъқулроқ?
— Испанияники, чунки техникага асосланган.
— ЦСКАдан Ла Лига клубига ўтишни мақсад қилиб қўйганмисан?
— Мақсадларим катта. Албатта, вақти келганда топ-клубга ўтишни истайман.
Аббосбек Файзуллаев якунланган мавсумда Россия Премьер-лигаси ва мамлакат кубогида жами 32 та учрашувда майдонга тушиб, рақиблар дарвозасига бешта гол киритди ва жамоадошларига 14 маротаба голли пас узатди.
Трансферларга ихтисослашган transfermarkt.world портали 20 ёшли ҳужумкор футболчимизни 5 миллион еврога баҳоламоқда. Бу борада Аббос кучли бешлик чемпионатларидаги энг тажрибали легионеримиз Элдор Шомуродов билан бирга энг қиммат ўзбек футболчиси ҳисобланади.
Ана холос: ЦСКА бош мураббийи Файзуллаев трансферини ҳоҳламаган экан!
10 миллион евро Файзуллаев учун кам! Яхшигина харажат қилишсин!