"Энергетик-БГУ"ни тарк этган Шаҳзод Убайдуллаев Польша ва Венгриядан таклиф олди ёки "Шахтёр"га қайтадими? Легионеримиз билан суҳбат

Иқтидорли ҳужумчимиз Шаҳзод Убайдуллаев мавсум бошида Беларусь чемпионатига кетди ва у ерда дастлаб, “Шахтёр” билан шартнома тузди. Кейин “Энергетик-БГУ” жамоасига ижарага берилди.

Ушбу клубда легионеримиз 3 та гол урди ва 3 та ассист вазифасини бажарди. Sports.uz мухбири куни кеча Убайдуллаев билан суҳбат уюштирди.

- Сизни “Энергетик-БГУ” жамоаси билан хайрлашганингизни эшитдик...

- Мен “Энергетик” клубида ижарада ўйнаётгандим. Жамоа билан келишувимиз тугагани учун у ердан кетдим.

- Бу клубдаги фаолиятингиз қандай кечди? Сиз учун қониқарлими ёки кўнглингиз тўлмадими?

- Бу мавсум мен учун унчалик кўнгилдагидек ўтмади. Фақат битта нарсадан хурсанд бўлдим: жисмоний тайёргарлик бўйича жуда катта қониқиш ҳосил қилдим. Ўйин томондан қониқмаганимга келсак, иккинчи давра бошида “Энергетик-БГУ”да ёш ўйинчиларга кўпроқ имконият берилди. Шу сабабдан, бизга - олдинги чизиққа тўп етиб келиши қийин бўлди. Ўртада тўп етказиб берадиган ўйинчи етишмади. Шунинг учун олдинги чизиқда қийинчилик бўлди.

- “Энергетик” клубига ўтган чоғингизда асосий мақсадингиз Европага кетиш ҳақида айтгандингиз. Ҳозир ҳам ўша мақсадингиз ўз кучидами ёки режангиз ўзгардими?

- Йўқ, ўзгармади. Мақсадим ҳали ҳам ўша. Менга Европа жамоаларидан таклифлар бор. Энди қолганини вақт кўрсатади.

- Янги мавсумни қаерда ўтказишни ўйлаб турибсиз?

- Ҳали бу ҳақда ўйлаб кўрганим йўқ. Худо хоҳласа, Европада ўйнашни орзу қиляпман. Менга яхши таклифлар бор, нима бўлиши ва қаерга ўтишимни вақт кўрсатади. Бу борада маслаҳатлашадиган одамларим бор. Улар билан барчасини яхшилаб маслаҳат қилганимдан кейин бир қарорга келаман.

- Сир бўлмаса, Европадан қайси клублар қизиқиш билдиряпти?

- Ҳозирча Польша ва Венгриядан таклифлар бор.

- Бундай таклифларга қандай қараяпсиз? Музокаралар бошланганми?

- Тўғриси, мен ҳали бу хусусида ўйлаб кўрганим йўқ. Чунки боя айтдим, маслаҳатлашадиган одамим бор. Улар билан гаплашгач, кейин ҳал қиламиз. Очиғи, бундай таклифлар менга ҳали қизиқ туюлгани йўқ. Чунки мен ҳали тўлиқ бир йил ўйин амалиётига эга бўлишим керак. Агар келаси йили “Шахтёр” мени қайтарса, ўша ерда бир мавсумни кўтаринки руҳда ўтказиб, кейин кетмоқчиман. Бу йил эса, у ерда ишлаган мураббий билан ўртамизда бироз келишмовчилик бўлганди. Шу сабабдан, “Шахтёр” клубидан кетгандим. Энди мураббий ўзгарди. Худо хоҳласа, кейинги мавсум бошқача бўлади, деган умиддаман.

- Бу масалада “Шахтёр” клубидагилар билан гаплашдингизми?

- Ҳали улар билан гаплашмадим. Ҳозирча уйда дам оляпман. Катта эҳтимол билан биринчи ва иккинчи йиғинни “Шахтёр”да ўтказсам керак.

- Беларусь чемпионатида ўйнадингиз ва у ердаги муҳитни энди яхши биласиз. Ўзимизни Суперлигамиздан қандай фарқли жиҳатларини кўрдингиз?

- Ўтган йили Беларусь чемпионатини осон, деб ўйлагандим. Лекин у ерга бориб гувоҳи бўлдимки, чемпионати қийин экан. Ўзимиздаги биринчилик билан фарқи шундаки, у ерда жисмоний тайёргарлик кучли бўлади, бизда техникага таянилади. Лекин уларни биздан кучли ҳам, кучсиз ҳам дея олмайман. Аммо, барибир бу Европа.

- “Шахтёр”га қачон қайтасиз?

- Уйда дам оляпман. Ўзлари алоқага чиқишади. Йиғин қачон ва қаерда тўпланишимизни хабар қиладилар.

- Суперлигамиздан ҳам хизматингизга аниқ таклифлар борми? Агар “Шахтёр” сизни ижарага берамиз деса, ўзимизга қайтасизми?

- Менга ҳали Суперлигамиз клубларидан алоқага чиқмаган. Ҳозирча Ўзбекистон чемпионатига қайтиш ниятим йўқ.

- Илгари миллий терма жамоамизга сизни ҳам чақириб туришарди. Янги мураббий сизни кузатяпти, деб ўйлайсизми?

- Мени ҳам чақирса, албатта ўзимни кўрсатишга ҳаракат қиламан. Ўзимга ишонаман. Терма жамоамиздаги футболчилар билан тезда киришиб кетаман. Ўтган йили ва бу йил бошида ҳам чақирув олгандим.