Эксперт: Бу футболчи Ҳусановнинг йўлини тўсяпти
- 25-июл 2025, 08:03
- Zohir Toshxo’jayev
- 0
- Футбол
“Манчестер Сити” ўтган мавсумда кетма-кет тўрт йил давомида қўлга киритилган Англия чемпионлигини “Ливерпуль”га бой берганидан кейин Хосеп Гвардиола таркибда жиддий ўзгаришларни амалга оширишга қарор қилди.
Буюк Британиянинг sportsmole.co.uk портали етакчи репортёри Оливер Томас Esteemed Kompany компаниясининг “Манчестер Сити” бўйича эксперти Стивен Макинернининг “шаҳарликлар” трансфер сиёсати таҳлилини келтириб ўтди.
Sports.uz портали ушбу таҳлилий мақолани Абдуқодир Ҳусанов ҳурматидан “Манчестер Сити”га ишқибозлик қилаётган ўзбекистонлик футбол мухлислари эътиборига ҳавола этади.
Стивен Макинерни таҳлилда қуйидаги фикрларни илгари сурди:
- “Манчестер Сити” марказий ҳимоячиси Мануэль Аканжининг “Галатасарой”га ўтиши ҳаммани қониқтирадиган трансфер ҳисобланади. Чунки бу футболчи айни пайтда клубнинг ёш ҳимоячилари йўлини тўсиб турибди. Аслида ёшлар Хосеп Гвардиола қўл остида кўпроқ ўйин ўтказишлари лозим.
Аканжи “Сити”га 2022 йилнинг ёзида “Боруссия Дортмунд”дан 15 миллион фунт стерлингга яқин маблағ эвазига олиб келинган ва “шаҳарликлар” таркибидаги дебют мавсумини требл билан якунлади.
Аканжи жамоанинг Англия Премьер-лигаси, мамлакат кубоги ва клуб тарихида биринчи бор Европа Чемпионлар лигасида ғолиб чиқишида муҳим роль ўйнади.
Швейцариялик ҳимоячи ҳозирга қадар манчестерликлар сафида барча турнирларда 136 та учрашувда иштирок этди. Бироқ, яқинда 30 ёшни қарши олган футболчи кейинги пайтда танқидларга кўп нишон бўлиб келяпти. Унинг шартномаси якунланишига ҳали яна икки йил бор. Лекин Аканжи шу ёз Туркияга кетиши мумкин.
“Галатасарой” мутасаддилари Эдерсон ва Илкай Гюндоғанга қизиқаётгани билан бир қаторда Аканжи трансферини уддалашга ҳам ҳаракат қилмоқда. Агар бу келишув амалга ошиши учун Мануэль маош талабини бироз пасайтиришига тўғри келади.
Менинг бу трансферларга муносабатим ижобий. Ҳозир “Сити”дан қанча кўп футболчи кетса, шунча яхши. Аканжи яхши ўйинчи, бироқ у ҳам треблдан кейин ўйинида пасайиш рўй берган футболчилар қаторига киради.
“Манчестер Сити”да айрим ижрочилар ўз имкониятлари чўққисига чиқиб бўлгани ва энди фақат қуйига шўнғиётгани очиқ-ойдин кўриниб турибди. Чунки бунақа юқори даражани ушлаб туриш осон эмас.
Аканжининг ёши ва таркибни янгилаш заруратидан келиб чиқиб, мен жамоага олинган Витор Рейс, Абдуқодир Ҳусанов ва Жума Ба каби ёш марказий ҳимоячиларга имконият берилишини истайман.
Рубен Диаш ва Йошко Гвардиол жуда кучли тандем, бироқ мен майдонда бундан буён Ҳусанов ва Рейсни кўрмоқчиман, уларнинг ҳам салоҳияти жуда улкан.
Жамоа таркибни қайта шакллантираётгани мантиқан тўғри. Бу жараёнда Аканжи ёш ўйинчилар, хусусан, ўтган мавсум ўзини кўрсата олган Ҳусанов ва етарли даражада имкониятга эга бўлмаган Рейснинг йўлини тўсяпти.
Шу боис, мен Аканжининг кетишини хотиржам қабул қиламан. Ўйлашимча, бошқа клубда фаолиятини қайта жонлаштириш унинг ўзига ҳам фойда. Мен оддий мухлис сифатида ҳам Аканжининг ўйинида пасайиш давом этаётганини кўриб турибман. У кўп хато қиляпти, конвентрацияси ҳам аввалгидек эмас. Ҳозир жамоага курашга чанқоқ ёшлар керак. Шунинг учун ҳам унинг “Галатасарой”га ўтиши ҳаммани қониқтиради.
Аканжи – ҳимоячилар орасида кетишга асосий номзод. Чунки Жон Стоунз ва Натан Аке каби ёши катта ва кўп жароҳат олаётган ўйинчиларга бошқа клублар томонидан жиддий қизиқиш бўлаётгани йўқ, - деди Стивен Макинерни.