Дзюдо. Жаҳон чемпионатига тайёргарлик қизғин давом этмоқда

Мамлакатимизда ўтадиган дзюдо бўйича тарихий жаҳон чемпионати стартига атиги 8 кун қолди. Бугун Миллий Олимпия қўмитасида 6-13 октябрь кунлари ташкил этиладиган ушбу йирик мусобақага тайёргарликнинг ҳолати бўйича йиғилиш бўлиб ўтди. Бу ҳақда МОҚ матбуот хизмати хабар тарқатмоқда.

Ушбу йиғилишда МОҚ Бош котиби Ойбек Касимов, Қўмита раиси ўринбосари, мамлакат дзюдо федерацияси раиси Азизжон Камилов, Миллий Олимпия қўмитаси раиси ўринбосари Шерзод Ташматов, Халқаро дзюдо федерацияси менежери Лиза Аллан, шунингдек, ташкилий жараёнга масъул бўлган вакиллар иштирок этишди.

Тадбирни Азизжон Камилов олиб борди. Йиғилиш давомида ҳар бир йўналиш бўйича масъуллар бўлажак мусобақага оид сўнгги маълумотлар билан таништиришди. Унга кўра, 87 давлатдан 582 спортчи жаҳон чемпионатида иштирок этиш учун юртимизга ташриф буюради. Азизжон Якубжанович масъулиятли мусобақани юқори савияда ўтказиш учун барча ходимлардан бор кучларини сафарбар қилишларини сўраб қолди.

Мутасаддиларнинг маълум қилишича, 30 сентябрдан илк иштирокчи давлатлар Тошкентга етиб кела бошлайди. Шунингдек, мусобақа доирасида Бутунжаҳон таэквондо федерацияси президенти Чунгвон Чои, Халқаро сузиш федерацияси раҳбари Ҳусайн ал Мусаллам, Бирлашган кураш дунёси президенти Ненад Лалович каби бир қатор халқаро федерациялар раҳбарлари пойтахтимизга ташриф буюриши кутилмоқда. Йиғилишда мутасаддилар меҳмонлар фойдаланадиган транспорт-логистика тизимининг бенуқсон йўлга қўйилишини назоратга олиш, “Ҳумо арена” муз саройини халқаро федерация талабига мос равишда тайёрлаш масалаларига ҳам тўхталиб ўтишди.

Қайд этиш жоиз, айни пайтгача бўлган тайёргарлик ишларини кўздан кечираётган Лиза Аллан жараёнга юқори баҳо берди. Якунда масъулларга қисқа фурсат ичида мавжуд камчиликларни бартараф этиш, меҳмонлар учун барча қулайликларни яратиш бўйича керакли топшириқлар берилди.