Диёр Туропов: "Нефтчи"дан кетишим тўсатдан юз берди, демаган бўлардим"

Куни кеча “Нефтчи” клуби Диёр Туроповнинг кетганини расман эълон қилди.

Ярим ҳимоячи 2023 йилнинг январь ойида “Навбаҳор”дан “Нефтчи”га кўчиб ўтганди. Икки йил мобайнида Туропов фарғоналиклар сафида 44 та учрашувда майдонга тушиб, 5 та гол урди ва 1 та голли пас берди.

Туропов “Нефтчи” билан Анталия йиғинида қатнашаётганди. Энди эса у уйига қайтди. Sports.uz журналисти Диёр билан боғланди.

- Диёр, янги мавсумга "Нефтчи" билан тайёргарлик кўраётгандингиз. Аммо Анталия йиғинининг ярмидан ўтганда жамоадан кетганингиз эълон қилинди. Ҳаммаси тўсатдан юз бердими?

- “Нефтчи”дан кетишим тўсатдан юз берди, демаган бўлардим. Январь ойининг бошларида жамоа Туркияда йиғилди, ўқув-йиғин машғулотларини ўтказиши учун. Футбол ичида, спорт ичида юрган кишилар билишса керак, бу ўқув-йиғин машғулотларида юклама жуда катта бўлади. Шу боис барибир хоҳлайсизми ёки йўқми, соғлиқда муаммо келиб чиқиши мумкин. Жамоадан кетишимга шу омил сабаб бўлди. Январь ойининг бошида ўша юкламалар сабаб соғлигимда муаммо келиб чиқди. Бу хақида мураббийга мурожаат қилдим. У бу гапимга ишонмади ва ўртамизда бўлиб ўтган суҳбатда шуни тушуниб етдимки, оёқ синмагунча у ўшани кўрмагунича, жароҳат олмади, деган фикрда қолар экан (кулади).

- Фарғонадаги фаолиятингиздан қанчалик қониқдингиз?

- Фарғонадаги фаолиятимдан қониқдим. Мухлислар талабчан ва чиройли тарзда қўллаб-қувватлайди. Стадион тўла мухлис. Ҳар бир ўйиндан завқ оласиз, бундай атмосферада!

- “Нефтчи”га номдор футболчилар олиб келинди. Чемпионликка эришишига ишоняпсизми?

- Бу йил жамоага номдор ва яхши савияга эга бўлган футболчилар йиғилди. Улар чемпион бўла оладилар. Агар футболчиларга тўғри йўналиш берилса, салоҳияти етади, бунга ишонаман.

- Олдингизда қандай режалар бор ва қайси вариантни танлаяпсиз?

- Яқинда Туркиядан “Нефтчи” лагерни тарк этиб Ўзбекистонга келдим. Ҳозир оилам, яқинларим билан биргаман. Олдиндаги режалар ҳақида ҳали ўйлаганим йўқ.

- Виталий Левченко ва жамоанинг кетишингизга муносабати қандай бўлди?

- Левченконинг кетишимга бўлган муносабати менда ҳеч қанақа қизиқиш туғдиргани йўқ. Жамоадошларим ва раҳбарият билан илиқ тарзда хайрлашдик.

- Суперлигада жамоалар сони 16 тага етказилганига муносабатингиз қандай?

- Фикрим: ижобий!

- Янги мавсум бошланишига оз фурсат қолди. Тезроқ янги жамоага ўтиб мослашиш сизга энди қийинчилик туғдирмайдими?

- Худога шукр, ҳозир соғлигим яхши. Туркиядалигимда 10 кун мобайнида тикландим. Машғулотларни қўйиб юборганим сабаб, жисмоний тарафлама қийналишим мумкин. Лекин жамоага мослашиб кетиш менда қийинчилик туғдирмайди.