Диёр Имомхўжаев: «Агар бундай бўлса, ишдан кетаман»

Сиз ПФЛ раҳбарлигига тайинланган илк кунлардаёқ букмейкерлик компанияларини расмий равишда Ўзбекистонга кириб келиши ҳақида маълумотлар пайдо бўлди. Сиз бундан аввалги интервьюларингиздан бу нарса динда ҳаром этилган, аммо у футболга катта пуллар кириб келиши ҳақида фикр билдиргансиз. Айтингчи, сиз тарихда букмейкерлик компанияларини Ўзбекистонга кириб келишига йўл очиб берган шахс сифатида қолишдан қўрқмайсизми?

-  Мен бу нарсадан қўрқаман. Инсонларнинг сўзларини доимо ҳазм қилиб ўрганганман. Бунисини ҳазм қила олмайман. Эртага бу ишим учун жавоб беришим кераклигини яхши биламан. Шунинг учун бундан қўрқаман. Энди вазиятга бошқа кўз билан қараш мумкинлигини ҳам унутмаслик лозим. Ўзи шундоқ ҳам йилига 50 миллион доллар пул Ўзбекистондан ташқарига чиқиб кетмоқда. Агар букмейкерлик компаниялари ўзбек банклари билан битим имзоласа, бу сумма ўзимизда қолади. Бизда темирйўл, нефть ва бошқа катта компаниялар футболни ривожлантириш учун пул ажратишга мажбур бўлмоқда. Ҳозир футбол клубларини молиялаштираётган компанияларнинг муаммолари кўп. Агар биз уларни футболдан озод қилсак, бу халқимиз учун фойда бўлади. Биз дунёвий давлатда истиқомат қиламиз. Алкоголь ичимликлар сотиладиган мамлакатга букмейкерлик компанияларини кириб келишини тўғри қабул қилиш керак. Бу иш иймонли инсонлар учун яна бир синов бўлади. Мен диний ва дунёвий томондан ўз қарашларимни исботлаб бердим.

-  Шахсан ўзингиз бу нарса бизга керак, деб ҳисоблайсизми?

-  Буни мен ҳал этмайман. Биринчи навбатда, ЎФА тасдиқлаши лозим. Ана шунда бу иш амалга ошади. Биз ЎФАнинг қошида очилганмиз. Бизнинг ҳар бир қароримиз ЎФА орқали қабул қилинади. Шундай экан, бу саволга мен жавоб бера олмайман. Тўғриси, қўрқаман. Ҳали буни керакли жойда жавоби бор эканлигини яхши билганим учун ўзимни четга тортаман.

-  Агар сўнгги сўз сизда қолса, унда қандай қарор қабул қиласиз?

-  Сен мени ёқиб юбормоқчимисан?! Менга қолиб кетмайди, деган умиддаман. Тўғриси, жуда ҳам қўрқаман. Мендан катта раҳбарларимиз бор. Улар бу иш ўзбек футболига керак, деб билса, демак керак. Агар танлов менга қолса, яхшиси ишдан бўшаб кетаман. Сабаби, нариги дунёдаги савол-жавоб қандай оғир бўлишидан хабарим бор.

Тўлиқ интервью