Бутун жамоа эплолмаган ишни Шомуродов икки дақиқада уддалади!
- 21-феврал 2021, 20:02
- Zohir Toshxo’jayev
- 1
- Футбол
А Сериянинг 23-туридан ўрин олган “Женоа” ва “Верона” ўртасидаги учрашув Элдор Шомуродов учун омадли бўлди. Генуяликлар икки марта ҳисобда ортда боришига қарамай, ўйиннинг сўнгги дақиқаларида мағлубиятдан қутилиб қолди.
Беллашувга танаффусдан кейин қўшилган Шомуродов икки дақиқаю 58 сонияда гол уриб, ўйинда бурилиш ясай олди. Бу “Женоа” тарихида захирадан ўйинга тушиб, киритилган энг тезкор голлардан бири бўлди. Биринчи тайм давомида кўп вазиятларда рақиб қаршисида ожиз қолган “Женоа” ўзбек ҳужумчиси майдонга тушиши билан олдинга ўта бошлади.
Учрашув 2:2 ҳисобида якунланди. Мезбонлар сўнгги дақиқаларда мағлубиятдан қутилиб қолгани ўйинга ўзига хос интрига қўшди. Шу тариқа, “Женоа”нинг мағлубиятсиз серияси еттита учрашувни ташкил қилмоқда.
“Женоа” мухлислари Элдор Шомуродовнинг ўйинини ва жамоанинг мағлубиятдан қутилиб қолишидаги хизматларини алоҳида эътироф этди.
Эътиборингизга италиялик футбол ишқибозларининг ўзбек ҳужумчиси ҳақидаги фикрларини ҳавола қиламиз.
Michele Paciolla:
Шомуродовни мавсумдаги учинчи голи билан табриклаймиз. Ажойиб ўйин билан ҳам. У жуда фойдали ҳаракат қилди ва ҳужумларни тезлаштириб юборди.
Francesco Guida:
Элдорга гап йўқ. У ҳар қандай вазиятда ҳам охиригача курашадиган футболчи эканини кўрсатди. Бу галги голини ҳам шу тарзда киритгани тасодиф эмас.
Antonio Duron:
Элдор ўйинга тез қўшилиб кетди. Майдонга чиққанидан кейин уч дақиқа ичида гол урди. Афсуски, кейинчалик ўзини кўрсата олмади. Тўғрисини айтганда, қолган дақиқаларда бутун жамоа ўйини оқсади.
Carmine Ricciardi:
Бутун бир жамоа эплай олмаган ишни, ўзбек футболчиси икки дақиқада уддалаб, “Верона” дарвозасини ишғол қилди.
Aldo Campopiano:
Менимча, Шомуродов бу голи орқали бошланғич таркибдаги жойини яна қайтариб олди. Элдордек фойдали ўйинчи кўпроқ ўйнаши керак!
Pauline Bagnan: (Aldo Campopiano фиркига жавобан)
Мен эса, ўзбек ҳужумчиси ўйин давомида, рақиблар толиқиб қолганида майдонга туширилиши тарафдориман. Шундай ҳолатда, у ўзининг тезкорлиги ва курашувчанлиги билан жамоага катта фойда келтира олади.
Canio Cestone:
Ҳар гал Шомуродовнинг ўйинидан ҳафсалам пир бўлиб, уни танқид қила бошласам, Элдор менга гол уриш орқали жавоб қайтаради. Бу шунчаки, ажойиб. Энди уни кўпроқ танқид қиламан, шекилли.
Orlando Esposito:
Элдор учун жуда муҳим гол. У жароҳатдан кейин дарров ўзини кўрсатди. Афсуски, у кўп шикастланмоқда. Мавсум давомида уч марта сафдан чиқди. Шунга қарамай, ҳар гал ўзининг энг яхши формасига қайтишга жуда кам вақт сарфлаяпти.