"Бунёдкор"га 3 та гол урган "Қизилқум" чорак финалга йўл олди

Ўзбекистон кубоги баҳсларига старт берилди. Бугун 1/8 финал учрашувлари доирасида "Қизилқум" ва "Бунёдкор" клублари кейинги босқич йўлланмаси учун кураш олиб борди. Беллашув майдон эгаларининг 3:1 ҳисобидаги ғалабаси билан якунланди.

Ҳисобни биринчи бўлим сўнгида Миржамол Қосимов очди. Унинг жарима майдони ташқарисидан берган зарбасини дарвозабон қайтара олмади. Иккинчи таймда Жасур Азимов қарши ҳужумда рақибни жазолади. Бирга-бир вазиятга чиқиб борган футболчи дарвозабоннинг ожиз нуқтасини топа олди.

Ўтказиб юборилган икки голдан сўнг, "Бунёдкор" сафида дарвозабон алмашди. Бироқ 70-дақиқада Олег Толмасов ҳам узоқ масофадан зараб йўллаб, яқиндагина майдонга тушган посбонни ожиз қолдирди ва ҳисобни йирик кўринишга келтирди. Бу голларга "қалдирғочлар" Миржаҳон Мираҳмадовнинг биргина голи билан жавоб бера олди.