Буни фақат Моуриньо эплаган
- 19-апрел 2022, 13:00
- Zohir Toshxo’jayev
- 0
- Футбол
Жозе Моуриньо Конференциялар лигасида жамоасини ярим финал босқичига олиб чиқди. Бош мураббий олдига ушбу мусобақада ғолиб чиқиш вазифаси қўйилган. Якуний босқичда энг кучли тўртта клуб қолди.
Хусусан, “Рома” финал йўлланмаси учун “Лестер” билан рақобатлашади. Иккинчи ярим финалда “Марсель” футболчилари “Фейеноорд”га қарши баҳс олиб боради. Дастлабки ўйинлар 28 апрелга, жавоб учрашувлари 5 майга белгиланган.
“Лестер” билан бўладиган беллашув Жозе Моуриньо учун фаолияти давомида Еврокубоклардаги 11-ярим финал сифатида қайд этилади ва бу рекорд натижа ҳисобланади.
Ҳали Европадаги бирорта мураббий Еврокубоклар ярим финалида бу қадар кўп иштирок этмаган. Бу статистикани Marca нашри тақдим этди.
Унга кўра, Жозе Моуриньо тўққиз мартадан ярим финалга йўлланма олган италиялик Карло Анчелотти ва испаниялик Хосеп Гвардиола, финалга чиқиш учун саккиз маротабадан курашган шотландиялик сэр Алекс Фергюсон ва германиялик Юпп Хайнкесни ортда қолдирмоқда.
Шунингдек, Жозе Моуриньо Чемпионлар лигаси, Европа Лигаси ва Конференциялар лигаси турнирлари ярим финалига етиб борган ягона мураббий ҳисобланади. Агар “Рома” бу турнирда финалига чиқса ва ғалаба қозонса, Моуриньонинг рекордлари сони яна иккитага кўпаяди.
Эслатиб ўтамиз, УЕФА таснифидаги мусобақаларда Италия жамоалари сўнгги бор 2010 йилда бош совринни қўлга киритган. Ўшанда “Интер” клуби Чемпионлар лигасида зафар қучган эди.
“Рома”га испан футболчиси керак
“Валенсия” раҳбарияти ўз тарбияланувчиси Карлос Солерни янги шартномага кўндира олмаяпти.
2017 йилдан бери асосий таркибдан муқим жой олиб келаётган 25 ёшли футболчи майдон маркази ва ўнг қанотда ўйнай олади.
Унинг клуб билан амалдаги шартномаси келаси йили ёзда битади. Бу мавсум охирида уни арзонроқ нархга қўлга киритиш мумкин. “Валенсия” бунга йўл қўймаслик учун бир неча ой мобайнида янги шартнома бўйича музокара ўтказди. Лекин томонлар бу борада бир қарорга кела олмади.
Испан матбуотининг ёзишича, Карлос Солерга камида олтита жамоа таклиф юборган. Улар орасида “Барселона”, “Тоттенхэм” ва “Рома” каби таниқли клублар бор.
Жозе Моуриньо анчадан бери маҳоратли ярим ҳимоячини Римга келишини истаяпти. “Бўрилар” спорт директори Тьягу Пинто Солер атрофидаги вазиятни синчковлик билан кузатиб бормяпти ва қулай фурсат келиши билан уни “Рома”га кўчириб келмоқчи.
Карлос Солер бу мавсумда барча турнирларда 20 та учрашув ўтказиб, рақиблар дарвозасини 11 маротаба ишғол қилди ва жамоадошларига бешта голли пас оширди. Унинг трансфер суммаси 50 миллион еврога баҳоланаётган бўлса-да, шартномаси охирлаб бораётгани учун бу нарх ёзда пасайтирилади.
Пеллегринининг натижасига ҳали ҳеч ким эришмаган
“Рома” Еврокубокларда Италия шарафини ҳимоя қилишни давом эттираётган ягона клуб. Римликлар Конференциялар лигаси чорак финалида Норвегиянинг “Будё-Глимт” жамоасини ортда қолдириб, халқаро турнирнинг ярим финалига йўлланма олди.
Шу тариқа, римликлар сўнгги беш йилда уч маротаба Еврокубоклар ярим финалида қатнашадиган тўртинчи жамоа сифатида “Реал”, “Арсенал” ва “Ливерпуль” қаторига қўшилди.
“Рома” 2018 йили Чемпионлар лигаси 2021 йили Европа Лигаси ва бу йил Конференциялар лигаси ярим финалида ўйнайди.
“Рома”нинг бу натижаси жамоа сардори Лоренцо Пеллегринини ҳам рекордга етакламоқда. Римликлар сўнгги беш йилда уч марта халқаро мусобақалар ярим финалига чиққан бўлса, Лоренцо навбатдаги баҳс – 28 апрель куни “Лестер”га қарши ўтказиладиган ярим финалда майдонга тушиши билан ажойиб рекорд соҳибига айланади.
Аниқроқ айтганда, Лоренцо Пеллегрини “Рома” тарихида халқаро майдонда учта ярим финалда қатнашган биринчи футболчи сифатида тарихга киради.
Лоренцо Пеллегрини жорий мавсумда 32 та учрашувда 12 та гол ва олтита голли пас муаллифи бўлди.
