"Бу тўғри қарор бўлди" - Осиё чемпиони "Андижон"да нималарни мақсад қилмоқда?

Иқтидорли футболчи, Осиё чемпиони – Абубакир Ашуров куни кеча “Андижон” билан шартнома имзолади. Энди у янги мавсумда “Бургутлар” шарафини ҳимоя қилади. Айни пайтда жамоа билан Анталия йиғинида иштирок этаётган ҳимоячи бир қатор саволларга жавоб қайтарди.

- Абубакир, аввало мухлислар учун ўзингиз ҳақингизда тўхталиб ўтсангиз. Айтайлик, футболга кириб келишингиз қандай кечган, ким сабабчи бўлган?

- Ёшлигимдан спортга қизиқишим жуда юқори бўлган. Шу сабабли 9 ёшимдан Тошкент шаҳар 144-умумий мактаб стадионида футбол сари илк қадамимни ташлаганман. Албатта, ота-онам бунга розилик беришган. Биринчи мураббийи Шерзод Нарзуллаев. Бизда ҳамон доимий мулоқот бор. Устозим ҳамиша менга ишонарди ва шу боис мендан кўпроғини хоҳларди. Шунинг учун бўлса керак, кўп ҳолатларда мени ўзимдан катта бўлганлар билан шуғуллантирарди. Бу эса менга тезроқ ўсишимда туртки бўлган. Ўшанда жамоамизни номи “Истиқлол” эди ва ёшларнинг шаҳар чемпионатида қатнашганмиз. “Бунёдкор” академияси билан ўйиндан сўнг мураббий мени айнан “Бунёдкор” академиясига таклиф қилди. У ерда деярли бир ой машғулот ўтказдим. Аммо ўзим хоҳлагандек жамоа билан киришиб кета олмадим. Натижада мураббийимга ортиқ у ерга бормоқчи эмаслигимни айтдим. Кейинроқ биз “Пахтакор” академиясига қарши ўйнадик. Дмитрий Ан шогирдларига қарши учрашувда Беҳруз Асқаров, Аббос Файзуллаев, Отабек Боймуродов каби футболчилар бор эди. Ўйиндан кейин Ан мени ёнига чақирди. Мураббийим билан гаплашгач, мени ўз жамоасида кўришни хоҳлаётганини айтди. Натижада “Пахтакор” академиясига йўл олдим. Ота-онам ҳам хурсанд бўлган. Шу тариқа, 2019 йил якунланиб бораётган бир вақтда мени “Пахтакор” ёшлар жамоаси машғулотига чақиришди. Биринчи расмий шартномам 2020 йилнинг январида бўлган ва шу йили мен “Пахтакор” ёшлар жамоасига буткул ўтдим. 2021 йилнинг бошида Питер Хюистра бошчилигидаги “Пахтакор”нинг асосий жамоасига карши ўртоқлик ўйинида майдонга тушдик. Шундан сўнг мени асосий жамоа машғулотига жалб этишди. Аммо елкамдан олган жароҳат яна ўз сўзини айтди. Жамоадаги шифокор менга елкамни операция қилишни айтди. Шу боис 6 ойни операция ҳамда операциядан кейинги тикланишга сарфладим. Йилнинг сўнгида яна асосий жамоага жалб қилишди ва мен шу йили ўз дебютимни амалга оширдим. Шу тариқа, 2022 йилдан бошлаб мунтазам U-21 ёшлар жамоасида тўп сурдим. 2023 йилда U20 Осиё ва жаҳон чемпионатидан сўнг мени “Турон” таклиф қилди ва мен у ерда 11 та ўйинда асосий таркибда ўйнашга еришдим.

- Сиз 2023 йили ёшлар терма жамоамиз сафида Осиё чемпиони бўлдингиз. Бу ҳозиргача ҳаётингизнинг энг ёрқин лаҳзалари эканига шубҳа йўқ. Қандай хотиралар қолган?

- Биз Осиё чемпионатига жуда пухта тайёргарлик кўрдик. Мақсадимиз чемпионлик эди. Аллоҳга шукр, ватанимиз, ота-онамиз олдида юзимиз ёруғ бўлди. Ҳар бир учрашув эсда қоларли ўтди. Лекин финал учрашуви ва Юртбошимизнинг шахсан ўзлари ўйинга келиб қўллаб-қувватлашлари бизга янада мотивация бўлди. Стадион тўла мухлис олдида тўп тепиш бошқача хиссиёт беради. Чемпионликдан сўнг майдонда Президентимиз билан кўришиш, олтин медал ва биргаликда кўтарган Осиё Кубогимиз бу катта тарихлардан бири бўлди, деб ўйлайман.

- Жаҳон чемпионатида ҳам иштирок этгансиз. Бу энди мутлақо бошқа даража. Унинг салобати қандай эди ва хаяжонингизни қандай енга олгансиз?

- U 20 жаҳон чемпионати бу бошқа даража. У ерда фақат кучлилар йиғилган. Афсуски, биз ўзимиз хоҳлаган натижага эриша олмадик. Бироқ бу турнир ҳам биз учун сабоқ бўлди, дея оламан. Майдонда боримизни бериб, ҳаракат қилдик. Аммо бироз омад келмади. Ҳаяжон бўлди ва бу ўйиннинг бошида юз берадиган табиий ҳолат деса ҳам бўлади. Сизнинг шеригингизга тўғри пасингиз, рақибдан тўпни олиб қўйишингиз ўзингизга бўлган ишончни тезда оширади ва ҳаяжон йўқолади.

- "Андижон" - сиз учун фаолиятингизда янги чақирув. "Бургутлар" аъзосига айланишингизда ким катта туртки бўлди?

- Бу мавзунинг ҳам ўзига яраша сабаблари бор. “Пахтакор” жамоасида мен кутганимдек ўйнаб кета олмадим. Менга катта ишонч ҳам бўлмади. Лекин ҳаммаси яхшиликка. Айтганимдек, водий жамоасида тўп суришга улгурдим. Лекин “Андижон” бу катта жамоа. Ўз мухлисларига эга ва улар ҳар ўйинда жамоани ажойиб даражада қўллаб-қувватлашдан чарчашмайди. Бу ерга агентим билан маслаҳатлашган ҳолда келдим ва бу тўғри қарор бўлди.

- Жамоа билан Анталия йиғинидасиз ва дастлабки таассуротларингиз қандай?

- Таассуротлар жуда аъло. Дастлаб Тожикистонда йиғин ўтказдик. Жамоа мени жуда яхши кутиб олди ва бу менга жамоага киришиб кетишимда катта ёрдам бўлди. Ҳозирда Анталияда йиғин ўтказяпмиз. Барчаси режа асосида кечмоқда. Ҳамма билан ака-ука, дўст бўлиб олдим.

- Одатда, клубга келадиган ёш иқтидорлар учун "Андижон" ўзига хос трамплин бўлади. Сиз бу имкониятдан қандай фойдаланмоқчисиз?

- Албатта, ҳар бир футболчининг мақсади Топ 5 клубларида тўп суриш. Менинг ҳам мақсадим шу. “Андижон”да янада ўсишни, очилмаган жиҳатларимни очишни истайман. Бунинг учун жамоада ҳамма нарса етарли. Шунчаки, ишонч ва меҳнат қилиш лозим.

- “Андижон”нинг бир бўлаги сифатида ўзингизни кўрсатишга тайёрмисиз?

- Ҳа, албатта. Биз бир жамоамиз. Ҳамманинг бу ерда ўз ўрни бор. Бу йил янада ёрқинроқ ўйин кўрсатишга ва “Андижон” мухлисларини хурсанд қилишга ҳаракат қиламиз.