Бобур Акмалов: Ишонч эмас, умид бор

Хабарингиз бор, бугун Ўзбекистон миллий терма жамоаси Жаҳон чемпионати-2026 саралаши доирасида Эрон терма жамоаси билан ўйнайди. Ушбу учрашув олдидан футбол жамоатчилиги фикрини ўргандик.

Марҳамат, шарҳловчи, Kun.uz журналисти ҳамда футбол блогери Бобур Акмаловнинг ўйинолди фикрлари билан танишиб чиқишингиз мумкин:  

Эртанги учрашувда терма жамоамизни ғалаба қозонишига ишоняпсизми? 

- Жамоага ғалаба жуда зарур. Бироқ бу осон бўлмайди. Ҳар доимгидек, ишонч эмас, умид бор. 

Сизнингча, ўйин жараёни қандай кечади? 

- Учрашув оғир кечади. Бу гуруҳдаги икки пешқадам терма жамоалар ўртасидаги баҳс ва икки терма учун ҳам қийин бўлади. Кеча Амир Ғаленойи ҳам бу ҳақда айтиб ўтди ва бизга нисбатан ҳурмат кўрсатди. Эҳтимол, Эрон ўйинни "қуритиш"га ҳаракат қилиши, очиқ ўйин таклиф қилмаслиги мумкин. Яна ким билади? Олдиндан бирор нарса, деб бўлмайди. Эроннинг таркиби ёши катта ҳамда тажрибали футболчилардан иборатлиги ва рейтингда 16-ўринда бораётганлигини томондан уларни биздан устун дейишимиз мумкин. Бироқ бизнинг устун тарафларимиз ҳам бор. Жумладан, жамоамизда ёшроқ ҳамда югурудиган ўйинчилар кўп. Шунингдек, таркибдагиларнинг аксари айни вақтда ўзининг энг яхши даражасини намойиш қилмоқда. Айниқса, кўп нарсани ҳал қилаётган легионерларимиз ўзини кўрсатадиган пайти. Ҳимояда ҳам, ярим ҳимояда ҳам, ҳужумда ҳам устунларимиз бор ва биз уларга таянишга ҳақлимиз. 

Тахминан қандай ҳисоб қайд этилади ва кимлар гол уради?

- Ҳисобни тахмин қилишни ёмон кўраман. Кимлар гол уришини ҳам билмайман. Бироқ ким гол уришидан қатъи назар, ўзимизга керакли натижага эришсак яхши бўларди. 

Умумийроқ савол. Термамизнинг иккинчи ўринни олиб, Жаҳон чемпионатига чиқиш имконятини қандай баҳолайсиз?

- Иккинчи ўринни олиб Жаҳон чемпионатига чиқиш имкониятимиз жуда яхши. Ҳали ҳеч қачон бу қадар яқин келмагандик. Олдимизда 3 учрашув бор ва ҳаммаси ўз қўлимизда. Биз бугунни ўзидан Жаҳон чемпионати йўлланмасини ҳал қилишимиз мумкин. Бугун бўлмаса, қолган икки учрашувда. Ҳеч қандай математиканинг ҳожати йўқ. Шунинг учун, бу ерда ҳам ишонч эмас, умид бор. Худди биринчи саволга жавоб берганим каби. Олға, Ўзбекистон!