Белбоғли кураш Федерацияси томонидан "Йил Сарҳисоби" тадбири ўтказилди

Жорий йилнинг 18 январь куни Ўзбекистон давлат жисмоний тарбия ва спорт университетининг мажлислар залида Ўзбекистон белбоғли кураш федерациясининг 2024 йил якунларига бағишланган тантанали тадбири бўлиб ўтди.

Унда Ўзбекистон  "Адолат" СДП сиёсий Кенгаш раиси Робахон Маҳмудова, Ўзбекистон "Адолат" СДП сиёсий Кенгаши раиси ўринбосари Абдукамол Раҳмонов, Осиё белбоғли кураш конфедрацияси президенти Мўмин Муратов, "Адолат"  СДП Тошкент вилояти Кенгаши раиси Гулнора Аҳмедова, Ўзбекистон белбоғли кураш федерацияси раиси Равшан Дастиров, спортчилар, мураббий ва ҳакамлар ҳамда ОАВ вакиллари иштирок этишди.

Тадбирни Ўзбекистон белбоғли кураш федерацияси раиси Равшан Дастиров кириш сўзи билан бошлаб, ортда қолган 2024 йил белбоғли кураш спорти учун юксак натижалар ва муваффақиятларга бой йил бўлганлигини эътироф этди. 

Спортчиларимиз республика ва жаҳон миқёсида ўтказилган мусобақаларда шохсупанинг юқори поғоналаридан ўрин эгаллаб, мамлакатимиз спорт захирасига медаллар шодасини тақдим этишгани, юртимиз шаънини муносиб ҳимоя қилганликларини мамнуният билан қайд этди. 

Маросимда шунингдек, "Адолат" СДП сиёсий кенгаши раиси Робахон Маҳмудова ҳамда Осиё белбоғли кураш конфедрацияси президенти Мўмин Муратовлар ҳам йиғилганларни қутлаб, миллий  спорт турларимизга,  хусусан белбоғли кураш спорт турига қаратилаётган эътибор ва белбоғли курашни ривожлантириш масалалари ҳақида тўхталиб, жорий йилги халқаро мусобақаларда полвонларимизга муваффақият тилади.

Тадбирда шунингдек, белбоғли кураш федерацияси томонидан турли номинациялар бўйича  ғолиблар аниқланди. Унга кўра "Йилнинг энг яхши спортчиси" номинациясида ўғил болалар ўртасида Жамолиддин Неъматуллаев, қизлар ўртасида Фарангиз Абдунабиевалар лойиқ кўрилди. "Йилнинг энг яхши мураббийи" номинациясини катталар терма жамоаси бош мураббийи Шавкат Мирзақулов ва ёшлар терма жамоаси бош мураббийи Бахтиёр Турғунпўлатов қўлга киритди. "Йилнинг энг яхши мусобақа ташкилотчиси"га Қорақалпоғистон  Республикаси ва Фарғона вилояти белбоғли кураш федерациялари муносиб кўрилди." Йилнинг энг яхши ҳаками" сифатида Соҳибжон Қосимов  (Бухоро), Алимардон Мирзаев (Андижон) эътироф этилган бўлса, "Йилнинг энг яхши натижадор федерацияси" Андижон  вилояти белбоғли кураш федерациясига берилди. "Спорт соҳасидаги кўп йиллик хизматлари учун" номинацияси ғолиби деб Аҳмад Маллабоев (Наманган) эълон қилинди.  

Шунингдек, Ўзбекистон белбоғли кураш федерацияси билан яқиндан ҳамкорлик қилиб келаётганлиги учун тадбиркор Бекзод Болтабаев ва бир қатор соҳа вакиллари Осиё белбоғли кураш конфедрацияси ҳамда Ўзбекистон белбоғли кураш федерациясининг ташаккурнома ва эсдалик совғалари билан мукофотланишди. 
Белбоғли кураш федерациясининг доимий ҳамкори ҳисобланган "Адолат " СДП сиёсий Кенгаши томонидан белбоғли кураш федерацияси бош котиби Абдухалил Маликов ҳамда жаҳон чемпиони Фарангиз Абдунабиевалар "Адолат" СДПнинг кўкрак нишони билан мукофотланишди. Бундан ташқари  партия вакиллари турли йўналишлар бўйича номинация ғолиблари, федерация кенгаши аъзолари, спортчилар ва мураббийиларга диплом ҳамда эсдаликлар топширди.