Эксперт: Ўзбекистон жаҳон чемпионатига тасодифан чиқиб қолмаган!
Россиянинг ЦСКА клуби таркибида тўп сурган собиқ футболчи Денис Попов «Евро-Футбол» интернет-нашрга берган интервьюсида Россия терма жамоасига қарши ўртоқлик учрашуви арафасида Ўзбекистон терма жамоасининг салоҳияти ҳақида фикр билдирди.
- Ўзбекистон "ЖЧ-2026"да ўйнади. Россия учун бу рақиб Эрон ёки Нигерияга нисбатан қийинроқми?
- Уларни тўғридан-тўғри таққослаш осон эмас. Лекин барибир гап шундаки, бу жамоа АҚШда бўлиб ўтган жаҳон чемпионатига йўл олган. Шунинг ўзиёқ Ўзбекистон маълум даражадаги кучга эга эканини кўрсатади, айниқса, ўз майдонида ўйнаётганини инобатга олсак.
Энг асосийси – улар сўнгги жаҳон чемпионати иштирокчилари.
- Уларнинг "ЖЧ-2026"да қатнашгани жамоа даражасидан далолат берадими?
- Албатта. Улар жаҳон чемпионатига саралаш босқичларини амалдаги тизим, формат шароитида муваффақиятли ўтди. Жаҳон чемпионатига тасодифан чиқиб қолишнинг иложи йўқ, бу жиддий меҳнат ва барқарор ўйин натижасидир.
- Ўзбекистондан РПЛда ўйнаган кўплаб футболчиларни биламиз. Уларни алоҳида кузатасизми?
- Ўша футболчиларни махсус тарзда алоҳида кузатаман, деб айта олмайман. Мен учун асосий эътибор – ўз терма жамоамиз ўйини. Шу қизиқроқ. Ҳозирча мени Ўзбекистон билан боғлаб турадиган омил йўқ.
Мен кўпроқ бизнинг футболчиларга қарамоқчиман, улар майдонда ўзини қандай кўрсатади – шу муҳим. Шу билан бирга, бу ўртоқлик ўйини, расмий бўлмаган учрашув эканини ҳам унутмаслик керак.
Ўзбекистон терма жамоасининг энг кучли таркиби майдонга тушадими-йўқми, ҳали аниқ эмас. Катта эҳтимол билан етакчи футболчиларнинг ўзи келмаслиги ҳам мумкин.
Эслатиб ўтамиз, Ўзбекистон ва Россия миллий терма жамоалари ўртасидаги ўртоқлик учрашуви 12 ноябрь куни Тошкент шаҳрида ташкил этилади. Бу икки жамоа илгари бир маротаба тўқнаш келган. 2022 йили Тошкентда ўтказилган учрашувда ҳисоб очилмаган эди.